OEKUSI, 21 Abríl 2026 (TATOLI) – Ministru Obra Públika (MOP), Samuel Marçal, sei orienta Eletrsidade de Timor-Leste, Empreza Públika (EDTL,E.P) atu jere hamutuk funsionamentu EDTL Rejiaun Administrativa Espesiál Oekusi Ambeno (RAEOA), atu hadi’a sistema kontadór sira tanba bazeia relatóriu anuál, reseita no despeza la balansu.
Ministru Obra Públika, Samuel Marçal, informa, iha ámbitu enkontru ho membru autoridade RAEOA no kargu xefia sira iha seremónia instalasaun Sekretáriadu Fundu Espesiál Dezenvolvimentu (FED) hala’o iha salaun Konvensaun Palaban, segunda ne’e.
“Reseita no despeza iha EDTL Oekusi la balansu, tanba kada tinan gasta osan ba mina besik milaun $6 maibé nia reseita mak rihun $400, ne’e katak maioria la selu ahi, ha’u-nia problema maka loza Xineza sira iha Oekusi balun seidauk selu, edifísiu públiku sira hotu mós seidauk selu ahi, ne’e mak EDTL E.P atu mai haree buat sira-ne’e,” nia hateten
Notísia relevante:Reseita no despeza EDTL Oekusi dezekilíbriu
Governante ne’e informa, nu’udar Prezidente Fundu Espesiál Dezenvolvimentu iha Oekusi, nia observa katak, sidaudaun barak mak seidauk kumpre hodi selu ahi ba kofre Estadu, tan ne’e prezensa EDTL,E.P iha Oekusi sei hadi’a sistema instalasaun kobre to’o área rurál sira.
“Tanba EDTL mós tama ona FED, iha MOP nia okos, tan ne’e maka husu E.P nasionál sei mai jere hamutuk, tanba Oekusi kuaze maioria seidauk instala kontadór, entaun sira labele selu eletrisidade, tan ne’e husi EDTL E.P sei mai ajuda sira, atu haree sistema no instala di’akliu tan,” nia hateten.
Xefe Departamentu EDTL Oekusi, Antão Cabal, informa, antes ne’e EDTL Oekusi simu ona orinetasaun husi EDTL,E.P liliu ba estimasaun kontadór no produsaun komersiál.
“EDTL,E.P halo ona asesmentu (avaliasaun) mai Oekusi no ami mós simu ona orientasaun balun, ne’ebé ami senti iha futuru di’akliu kompara ho agora, tanba daudaun ne’e, ita-nia sistema ne’ebé estabelese iha Oekusi di’ak maibé seidauk másimu liliu estimasaun kontadór ba kliénte sira no mós parte produsaun komersiál ninian,” nia hateten.
Notísia relevante:2025, EDTL Oekusi kontribui reseita rihun $744-resin ba kofre Estadu
Entretantu, iha 2025, EDTL RAEOA konsege rekolla reseita reseita ba kofre Estadu hamutuk rihun $744,924.42, husi tipu haat, mak hanesan, sistema ka vende enerjia elétrika rihun $660,595.00, pas-pago konvisionál rihun $76,231.42, ligasaun foun rihun $7,848.00 no ligasaun illegál rihun $250.00.
Jornalista: Abílio Elo Nini
Editór: Rafael Ximenes de A. Belo
