DILI, 22 Abríl 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Proposta-Lei, ne’ebé aprezenta hosi Ministra Finansa, Santina José Rodrigues F. Viegas Cardoso, alterasaun dahuluk ba Lei nú. 13/2011, loron 28 fulan-Setembru, kona-ba Rejime Dívida Públika.
Proposta ne’e permite habelar tan ámbitu emisaun dívida públika nian, hodi la limita de’it ba finansiamentu infraestrutura estratéjikas, atu nune’e bele permite uza instrumentu hanesan títulu tezouru hodi finansia despeza jerál Estadu nian.
Vise-Ministru ba Asuntu Parlamentár, Adérito Hugo, hateten ohin iha ajenda rua de’it mak ida aprezenta proposta direta husi Primeiru-Ministru kona-ba alterasaun lei nú. 13/2011 kona-ba rejime dívida públika.
“Hanesan ita hatene katak rejime dívida públikas mak durante tinan barak nia laran ita halo jestaun investimentu interna (doméstika) no esterna husi orsamentu Estadu no impréstimu, entaun sistema ida-ne’e mak ita atualiza ho ita-nia dinámika dezenvolvimentu nasaun nian ba polítika dívida durante tinan barak nia laran,” Vise-Ministru ne’e relata ba jornalista sira iha Palásiu Governu, ohin.
Tanba ne’e, nia dehan, hanesan proposta-lei ida entaun sei kontinua submete tan ba Parlamentu Nasionál hodi halo audiénsia públika no aprovasaun.
Alterasaun ida-ne’e ho objetivu atu aliña rejime dívida públika nasionál ho prátika sira-ne’ebé adota ona iha maioria nasaun sira no kria kondisaun ba jestaun finansa públika ida-neʼebé sustentável liu iha médiu no longu prazu.
Nune’e ho inisiativa ida-ne’e, Governu hanoin atu hametin sustentabilidade orsamentál, prepara nasaun ba diminuisaun progresiva reseita husi Fundu Mina-rai, no mós garante estabilidade boot-liu iha finansiamentu polítika públika neʼebé esensiál.
Entretantu fó lembra katak projetu Proposta-Lei ida-ne’e hetan ona deliberasaun iha sorumutu Konsellu Ministru loron 27 fulan-janeiru tinan 2026. Maibé, tuir ajustamentu ne’ebé introdús iha faze redasaun finál, liuliu atu klarifika regra ne’ebé relasiona ho emisaun no jestaun Títulu no Letra Tezouru, presiza reavaliasaun no deliberasaun foun ba Projetu Proposta-Lei ida-ne’e.
Jornalista : Alexandra da Costa
Editór : Cancio Ximenes
