DILI, 24 Abríl 2026 (TATOLI)—Saudozu Ministru Ensinu Superiór, Siénsia no Kultura, José Honório da Costa Pereira Jerónimo, Sesta ne’e, haloot ona iha nia rezidénsia Ekali, Suku Vatobou, Postu Administrativu Maubara, Munisípiu Likisá.
Iha serimónia fúnebre ne’e partisipa hosi Reprezentante Prezidente Repúblika, Xefe Kaza Sivil, Prezidente Tribunál Rekursu, membru Governu, akadémiku, parte igreja, estudante inklui komunidade Likisá.
Xefe Gabinete Ministériu Ensinu Superior, Siénsia no Kultura José Boavida Ximenes, dehan ohin lakon ona ema dedikadu di’ak ida, sempre tau interese nasionál ba dezenvolvimentu nasionál liliu ba ensinu superiór.
“Nia (Saudozu) simu responsabilidade ne’e iha 01 Jullu 2023, ne’ebé sempre rona ema hotu nia ideia no preokupasaun hosi sira-ne’ebé vizita no hosi dirijente, asesór no funsionáriu sira. Misaun boot ida, sempre tau interese nasionál no dezenvolvimentu ensinu superiór iha sentru ba nia asaun sira. Ohin ita la hanoin de’it nia nu’udár titulár ba kargu, haksolok no motivasaun, sempre dadalia no rona ema hotu iha ministériu,” Xefe Gabinete dehan iha serimónia fúnebre.
Notísia relevante: Família sente lakon ho falesimentu Ministru José Honório
Xefe Gabinete hateten iha saudozu nia mandatu tomak hetan ona progresu importante sira iha setór ensinu superiór, siénsia no kultura. Ho nia lideransa alkansa rezultadu ne’ebé tuir mai: aprosimasaun Lei Baze Superiór Instituitu Politékniku Betanu, transformasaun eskola ETCI ba Institutu Universidade Kafé Ermera, hahú prosesu instalasaun ba eskola superiór otelária no turizmu iha Lospalos, kria Komisaun Koordenadór Universitáriu no institu superiór sira, hala’o estudu diagnóstiku ba setór ensinu superiór no ba kapasidade korpu dosente sira-ne’ebé importante tebes hodi hadi’a ensinu superiór iha futuru.
Aleinde ne’e, iha saudozu nia mandatu, halo alterasaun ba Sistema Nasionál Kualifikasaun ne’ebé ki’ik no kurríkulu padraun nasionál, aprovasaun estatutu foun UNTL, aprovasaun projetu konstrusaun edifísiu foun sira ba Politékniku Betanu no edifísiu ministériu nian, implementasaun subvensaun públika hodi fó apoiu ba ensinu superiór privadu sira. Nune’e mós lansa ona eskola superiór Rais ne’ebé halo parseria ho Universidade Katólika Timorense (UCT-sigla portugeza) no sira seluk tan.
“Rezultadu hirak-ne’e nu’udár eransa Ministériu José Honório nian, ne’ebé husik hela mai ita no sei fó rezultadu di’ak iha futuru,” nia subliña.
Xefe Gabinete haktuir Saudozu Ministru mós partisipa iha prosesu Adezaun Asosiasaun Nasaun Sudeste Aziátiku (ASEAN), maktoban mós hanesan líder jerasaun foun ne’ebé sempre defende lian portugés nu’udár lian ofisiál no instituisaun prinsipál iha sistema edukativu hamutuk ho tetun liuliu iha ensinu superiór hodi hametin programa atribuisaun bolsa estudu ba dosente sira husi ensinu superiór privadu, hodi kontinua estudu iha nivel mestradu no doutoramentu iha nasaun ko’alia lian portugés.
Jornalista: Osória Marques
Editór: Xisto Freitas da Piedade
