DILI, 27 Abríl 2026 (TATOLI)—Ministru Obra Públika, Samuel Marçal, orienta ona ekipa tékniku ba halo levantamentu dadus hodi prepara dezeñu atu reabilita estrada iha Leorema Líkisa ba tinan ida-ne’e.
“Dalan ne’e tenke hadi’a duni tamba IGEADI konsege normaliza provizóriu ona maibé estrada ne’e kontinua aat nafatin, nune’e agora ita tenke halo dezeñu didi’ak. Horisehik no ohin orienta ona ekipa tékniku ba halo levantamentu dadus no loke alternativa ba dalan refere,” Ministru Samuel informa ba jornalista sira iha edifísiu MOP Kaikoli, ohin.
Governu esforsu sei normaliza imediatamente ba estrada Leorema nian ho kategória permanente ba tinan ida-ne’e, atu labele fó impaktu ba komunidade nia asesibilidade.
“Baibain infraetrutura ne’ebé aat ne’e ami hadi’a provizória uza orsamentu emerjénsia nian, tanba iha ministériu prevee orsamentu ba apoiu emerjénsia ne’e kuazé hamutuk millaun $10, maibé montante boot sira prevee iha fundu infraestrutura,” bnia dehan.
Jornalista : Alexandra da Costa
Editór : Cancio Ximenes
