DILI, 27 Abríl 2026 (TATOLI)-Deputadu husi bankada Kongresu Nasionál Rekonstrusaun Timorense (CNRT, sigla portugés), Mateus da Cruz, sujere katak ema ne’ebé atu substitui Ministru Ensinu Superiór, Siénsia no Kultura (MESSK) tenke figura ida-ne’ebé kompetente no iha koñesimentu di’ak iha área ensinu superiór nian.
Membru Komisaun G ne’ebé trata Asuntu Edukasaun, Juventude, Desportu, Kultura no Sidadania, hato’o sujestaun ne’e relasiona ho falesimentu Ministru José Honório da Costa Pereira Jerónimo, iha loron 21 fulan-Abríl tanba ataka kardíaku.
Nia dehan nomeasaun ne’e kompeténsia Primeiru-Ministru, Xanana Gusmão, maibé tenke haree ema ne’ebé iha duni abilidade no koñesimentu iha área referida hodi kontinua dezenvolve setór ida-ne’e.
Tuir nia, ministériu ne’e importante tanba tau-matan ba instituisaun ensinu superiór 18 iha nia tutela.
“Ha’u-nia sujestaun ema doutoramentu ruma mai husi universidade sira para prosesu sira ne’ebé la’o iha universidade nian bele komprende hodi hala’o knaar di’ak liu. Hatene lala’ok universidade nian”, nia rekomenda iha Parlamentu Nasionál, ohin.
Xefe bankada Partidu Demokrátiku (PD), Manuel Henrique Noronha, espresa sentimentu triste tanba partidu lakon kuadru di’ak ida. Hodi dehan PD iha figura ne’ebé poténsia iha área ensinu superiór hodi bele troka matebian, maibé ne’e kompeténsia partidu nian mak sei deside.
Lembra katak iha enkontru semanál iha loron 23 Abríl, Primeiru-Ministru, Xanana Gusmão, informa ona Prezidente Repúblika, José Ramos-Horta, kona-ba falesimentu Ministru Ensinu Superiór, Siénsia no Kultura, José Honório da Costa Jerónimo.
Notísia relevante: Governu apresia saudozu Ministru Honório nia servisu durante lidera MESSK
Jornalista: Nelson de Sousa
Editora: Maria Auxiliadora
