DILI, 28 Abríl 2026 (TATOLI)—Ekipa konjunta ne’ebé kompostu husi Ministériu Obra Públika hamutuk ho Sekretária Estadu Asuntu Toponímia no Organizasaun Urbana (SEATOU) inklui Administrasaun Aeroportu no Navegasaun Aérea Timor-Leste, ANATL, E.P, halo normalizasaun ba drenajen (bee-dalan) ne’ebé intupidu iha área Aeroportu Internasionál Prezidente Nicolau Lobato Komoro.
Notísia Relevante: Xanana orienta SEATOU-ADN fó atensaun ba drenajen iha rotunda Nicolau Lobato
Bee-dalan ne’ebé intupidu fó rezulta bee nalihun iha pista aeroportu nian no fó impaktu ba operasaun aviaun no movimentasaun pasajeiru bainhira tun husi aviaun (landing).
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten ohin ekipa konjunta mai hamutuk ho ANATL haree drenajen ne’ebé mak intupidu ho sedimentasaun no duut hodi kria inundasaun ba área aeroportu laran liuliu pista nian.
“Tanba ne’e mak ohin ne’e to’o ona tempu atu ita halo normalizasaun ho mákina, atu nune’e tempu udan karik bee bele sulin tuir drenajen ba to’o mota Marinir Komoro nian ne’e,” Sekretáriu Estadu ne’e relata ba jornalista sira iha Aeroportu Internasionál Nicolau Lobato Komoro, ohin.
SEATOU afirma katak nisiativa ne’e atu responde de’it ba preokupasaun ema hotu nian liuliu maluk sira-ne’ebé baibain akompaña situasaun no públika iha mídia sosiál.
“Prosesu normaliza ne’e ha’u labele garante to’o 100% atu diminui inundasaun iha aeroportu tanba mudansa klimátika ne’e ita lahatene. Maibé atu hateten katak servisu ne’ebé ita halo bele diminui no normaliza bee sulin tuir nia dalan, ami sei hasai mós ai-horis ne’ebé moris iha aeroportu laran bainhira afeta ba prosesu normalizasaun drainajen,” nia dehan.
Aleinde ne’e, nia dehan, ekipa konjunta mós halo ona valeta ida iha rotunda Nicolau Lobatu nian durante semana ida ona tanba bainhira bee nalihun iha ne’ebá nia sei la sulin tuir drenajen entaun bee ne’e nalihun fali iha estrada mak sulin tun ba aeroportu laran.
“Nune’e, ha’u fiar katak bainhira udan boot ita bele halo kontrola bee-dalan ho di’ak atu bee sulin ho normál tun ba karantina, atu hamenus volume bee sulin ba aeroportu laran,” nia hateten.
Prezidente ANTL, Romualdo da Silva, hato’o agradesimentu ba servisu ekipa konjunta ne’ebé bele ajuda mós ANATL normaliza bee-dalan sira, tanba iha semana ida ba kotuk konsege mosu inundasaun iha aeroportu laran ne’ebé afeta husi drenajen ne’ebé intupidu.
“Entaun, ami mós hahú hamoos ona drenajen sira, hasai sedimentasaun, duut, ami mós konsege kee bee-dalan foun atu udan mai karik bee bele sulin tuir kanalizasaun oioin hodi redús intupidu ba drainajen,” nia dehan.
Nune’e, nia dehan, normalizasaun ida-ne’e la’ós atu garante 100% ba diminuisaun inundasaun maibé redús ona volume bee iha rotunda Nicolau Lobato no iha aeroportu laran.
“Planu atu loke espasu barajen nian, prinsipalmente hanesan ita hotu hatene katak kompañia Waskita Karya mak manán projetu ne’e no agora daudaun sira halo hela servisu no ohin kompañia Santos prepara atu sobu,” nia informa.
Nia fiar katak kompañia Santos bele sobu ona atu nune’e kompañia Waskita Karya kontinua kee paralelu task able, maibé daudaun ne’e kompañia kontinua halo servisu ba aeroportu no JICA mós bele hahú sobu ona edifísiu ANATL ho tore kontrolu para prepara ka kontrusaun terminál foun.
“Tempu badak, ami hamutuk ho SEATOU mós sei halo limpeza ba komunidade afetadu sira-nia propriedade ne’ebé Governu indemniza ona no sira bele hamamuk fatin iha fulan-Maiu nia laran,” nia dehan.
Jornalista : Alexandra da Costa
Editór : Cancio Ximenes
