VIKEKE, 28 Abríl 2026 (TATOLI)—Responsavel ekipamentu pezadu iha Postu Uatulari, Munisípiu Vikeke, Vicente Rui Soares, informa ekipa husi Ministériu Agrikultura, Peska, Pekuária no Floresta (MAPPF) konklui ona normalizasaun ba irrigasaun Saeketu ne’ebé kanaliza bee ba natar sira iha Laleiu.
“Kona-ba normalizasaun irrigasaun Saeketu ne’ebé hamosu sedimentasaun, ita-nia ekipamentu pezadu servisu kuaze semana ida-resin foin konklui. Daudaun ne’e, ita komesa loke bee hodi fornese be ba natar sira hodi agrikultór sira halo sira-nia natar,” Vicente ba TATOLI iha Postu Vikeke Vila, Tersa ne’e.
Notísia relevante: MAPPF destaka ona ekipamentu pezadu normaliza irrigasaun Saeketu ba natar Laleiu
Nune’e, nia rekomenda ba agrikultór sira nafatin tau-matan ba sedimentasaun iha irrigasaun no karik rai taka voluntária hamoos para fornese bee ba natar ho di’ak.
Tuir dadus, natar Makadike ho totál ektare 450 ne’ebé benefísia populasaun lokaliza iha Suku Makadike de Baixo, Makadike de Cima no Makadike Uaitame ho totál abitante 7.482 husi uma-kain 1.773.
Jornalista: Vitorino Lopes da Costa
Editór: Xisto Freitas da Piedade
