DILI, 29 Abríl 2026 (TATOLI)—Diretora Administrasaun Finansa Lojistika no Aprovizionamentu iha Hospitál Nasionál Guido Valadares (HNGV), Silvia Izina Ximenes, hateten instalasaun Closed Circuit Television (CCTV) iha Hospitál Nasionál Guido Valadares (HNGV) daudaun ne’e ramata ona no sei utiliza iha fulan-Maiu 2026.
Notísia Relevante: Prevene sasán lakon, Empreza Romanfalm96 instala CCTV iha HNGV
“Instalasun CCTV nian agora daudaun instala hotu ona no agora iha edifisiu administrasaun mak seidauk, sei monta rua ka tolu depois ida-ne’e hotu ita hein monitorizasaun no Maiu ita sei utiliza,” Silvia Izina afirma iha nia kna’ar fatin HNGV, Bidau, ohin.
Nia informa, HNGV garante katak instalasaun ne’e hotu bainhira utiliza mak ami garante katak bele redús sasán ne’ebé mak lakon husi pasiente inklui mós familia pasiente sira.
“Ami garante katak iha fulan-Maiu nia laran ita hala’o ona monitorizasaun ba CCTV iha HNGV,” nia dehan.
Antes ne’e, nia dehan, objetivu husi monta CCTV ne’e inisiativa husi konsellu diretiva husi Hospitál Nasionál Guido Valadares nian atu bele prevene sasán sira-ne’ebé mak lakon iha areadór ospitál nian, tanba sasán sira-ne’ebé lakon iha ospitál la’ós de’it husi família pasiente maibe mós funsionáriu ospitál nia sasán mós lakon hotu.
“Objetivu husi monta CCTV ne’e tanba ita hatene problema barak loos iha ospitál, la’ós ba públiku de’it, maibé ami sira funsionariu iha ospitál mós hanesan sempre iha motór lakon, iha helem lakon, kadavés iha area ospitál laran, dala ruma iha sala internamentu balun iha pasiente balun nia telemovel lakon no sasán lakon. Oinsá mak ita atu prevene sasán sira-ne’e labele lakon, entaun ospitál ho Konsellu iha inisiativa monta CCTV atu bele evita,” nia informa.
Aleinde atu kontrola sasán sira-ne’ebé mak lakon iha areadór ospitál maibé inklui servisu funsionáriu sira iha Hospitál Nasionál Guido Valadares.
“Ezemplu ita haree ba área farmásia nian, ai-moruk sira-ne’e tama oinsá, sai oinsá ne’e ita bele kontrola ida-ne’e. Ami funsionáriu sira mós bele kontrola oras tama servisu, sai servisu, ita bele kontrola liuhusi CCTV ne’e. CCTV ne’e sei monta iha IT nia fatin atu sira bele halo monitorizasaun ne’e iha ne’ebá. Karik ami presiza buat ruma, ami sei ba iha ne’ebá mak sira bele hato’o relatóriu mai ami,” nia hateten.
Nia hateten, Orsamentu ne’e mak Hospitál Nasionál Guido Valadares prevene hodi sosa CCTV ne’e hamutuk rihun $19.
“Orsamentu ne’e husi OJE 2025, tanba prosesu aprovizionamentu ne’e hala’o iha 2025 nia laran, ne’ebé orsamentu uza 2025 nian. Nia tama iha pagamentu adiantadu, ne’ebé iha fulan-Abríl nian laran ne’e sei halo pagamentu finál ona,” nia esplika.
Nia relata, tarjetu husi Hospitál Nasionál Guido Valadares ne’e sei sosa tan tanba prepara ba ospitál andar lima ne’ebé mak iha hela konstrusaun nia laran.
“Meta ba CCTV ne’e agora uza lai 34 nian depois ba oin mak ita haree to’ok tanba ita mós sei presiza ba andar lima ne’ebé mak iha atu monta CCTV ne’e. Planu tinan ida -e’e nia laran, ami sei aloka tan osan ba CCTV nian, hodi halo kompleta,” nia dehan.
Entretantu, CCTV refere sosá husi kompañia lokál ida Romanfalm96 Unipessoal, Lda, ho montante orsamentu rihun $19.
Jornalista : Felicidade Ximenes
Editór : Cancio Ximenes
