DILI, 29 Abríl 2026 (TATOLI) – Diresaun Nasionál Apoiu Dezenvolvimentu Mikro, Pekena no Média Empreza, Ministériu Komérsiu no Indústria (MKI), no Programa Nasaun Unida ba Dezenvolvimentu (PNUD) prevee orsamentu rihun $25 hodi komemora Loron Internasionál Mikro, Pekena no Média Empreza (MPME) ba datoluk ne’ebé sei monu iha loron 27 Juñu 2026.
Diretór Nasionál Apoiu Dezenvolvimentu Mikro, Pekena no Média Empreza, Reinaldo Borges, lembra katak Timor-Leste selebra data ne’e dezde 2024.
“Komemorasaun antes ne’e ita la prevee osan, maibé tinan ida-ne’e ita tau rihun $25 husi orsamentu ne’e MKI rihun $11 no PNUD prevee rihun $14. Ita sei konvida hotu empreza sira ne’ebé hetan ona apoiu husi Governu bele partisipa hotu eventu ne’e hodi hatudu sira-nia produtu”, Reinaldo Borges heteten ba Tatoli, iha Mandarin, Dili, ohin.
Tuir nia, selebrasaun ne’e importante tebes tanba husi sira mak kontribui ba dezenvolvimentu nasionál Timor-Leste nian, tanba setór ida-ne’e mak baze fundamental ba ekonomia nasionál, ajuda hamenus ki’ak, no kria postu traballu.
“Iha Timór dalan ida ita atu promove ita-nia empreza sira ne’e mak halo expo tanba husi ne’e mak ita hatene produtu saida mak sira prodús no bele partisipa iha expo sira ne’e”, nia dehan.
Atividade ne’ebé sei halo iha komemorasaun loron ne’e mak semináriu no espozisaun durante loron tolu hahú husi 25 to’o 27 Juñu.
Kona-ba preparativu sira, daudaun PNUD no MKI kontinua halo koordenasaun téknika ba realizasaun eventu ne’e.
Jornalista: Arminda Fonseca
Editora: Maria Auxiliadora
