DILI, 30 Abríl 2026 (TATOLI)—Diretór Nasionál Polísia Sientífika Investigsaun Kriminál (PCIC, sigla portugéz), Vicente Fernandes i Brito, lakohi fó komentáriu kona-ba atividade buska no apreensaun ne’ebé ekipa PCIC halo iha Gabinete Timor GAP, E.P, iha Timor Plaza, iha Kuarta (29/04).
Nia dehan, kuandu PCIC seidauk hetan autorizasaun husi na’in ba prosesu (Ministériu Públiku) mak seidauk bele ko’alia.
“Ha’u laiha komentáriu ida. Ami seidauk bele ko’alia ida-ne’e sé bainhira ema ida na’in ba prosesu seidauk autoriza ami ko’alia. Sé ami pronúnsia buat ruma ne’e bele Ministeriu Públiku avoka prosesu ba ami,” Vicente Fernandes hato’o ba Ajénsia TATOLI bainhira partisipa iha aniversáriu Programa Monitorizasaun Sistema Judisiál (JSMP), iha salaun Kuartel Jenerál F-FDTL, Fatuhada, Kinta ne’e.
Notísia relevante : PCIC halo buska no apreensaun iha Gabinete Timor GAP, E.P
Nia dehan, kazu ne’e komplesu oituan tanba ne’e PCIC labele fó komentáriu.
Antes ne’e, iha loron 29 Abríl 2026, ekipa PCIC halo buska no apreensaun hahú husi tuku 10:00 to’o 15:30, iha Gabinete Timor GAP, E.P, Timor Plaza, ne’ebé nu’udar kontinuasaun husi Komisaun Antí-Korrupasaun (CAC, sigla portugéz) nia operasaun hasoru Vise-Prezidente Timor GAP, E.P ho inisiál AC iha Kuarta (17/12/2025).
Atividade ne’e tanba hetan mandadu judisiál husi Ministériu Públiku hodi apura faktu sira.
Jornalista : Natalino Costa
Editora : Julia Chatarina
