BAUKAU, 05 Maiu 2026 (TATOLI)—Autoridade Postu Administrativu Baukau Vila fó prioridade ba setór haat iha Planu Dezenvolvimentu Komunitáriu (PDK) ne’ebé planeia atu implementa iha tinan 2027.
Administradór Postu Administrativu Baukau Vila, Aires de Fatima Correia, esplika elaborasaun PDK bazeia ba setór importánsia sira hanesan infraestrutura, bee no saneamentu, agrikultura, edukasaun, saúde, igualidade jéneru no ekonomia lokál ho prioridade prinsipál ba tinan 2027 hanesan reabilitasaun estrada rurál no ponte ki’ik, konstrusaun eskola pre-eskolár, postu saúde no reabilitasaun mini irrigasaun.
“PDK ida-ne’e hatudu prioridade komunidade hodi hadi’a moris hanesan infraestrutura no inkluzaun sosiál,” Aires Correia hateten iha Salaun Apuramentu Administrasaun Munisipál Vila Nova, Baukau, Tersa ne’e.
Aires relata Autoridade Postu Baukau nia planu PDK ba tinan 2027 tuir situasaun atuál bazeia ba dadus no konsultasaun ligadu ho sosiál ekonómiku no asesu ba kampu traballu liuliu iha setór bee-moos, saúde, edukasaun, infraestrutura, estrada no ponte, asuntu transversál, Ema ho Defisiénsia (EhD) no inkluzaun.
Aleinde ne’e, planu PDK halo tuir baze legál hanesan lei númeru 09/2016 kona-ba lei suku, Dekretu-Lei Númeru 04/2024 kona-ba PDK no diploma ministeriál númeru 15/2025 kona-ba aprovasaun modelu PDK ne’ebé elabora no aprezenta husi xefe suku iha Postu Baukau Vila.
“Prioridade sira-ne’e ba tinan 2027. Ita planu aloka orsamentu hamutuk rihun $800 tanba rajaun Desentralizasaun podér lokál ne’ebé aldeia,suku to’o postu presiza sira moris di’ak,” Aires Correia hateten.
Postu Administrativu Baukau Vila hasoru obstákulu ba implementasaun PDK hanesan kapasidade téknika nune’e presiza asisténsia téknika hanesan haforsa kapasitasaun, monitoriza no evaluasaun ba implementasaun PDK iha-ne’ebé dezafiu iha limitasaun orsamentu no definisaun prioridade iha aldeia no suku.
Entretantu, Postu Administrativu Baukau Vila hamutuk suku 13 husi aldeia 65 hanesan Bahú, Bukoli, Buibau, Buruma, Builai, Kaibada, Kaibada Makasae, Gariuai, Samalari, Seisál, Tirilolo, Triloka no Uailili iha-ne’ebé totál populasaun hamutuk 54.964 kompostu husi mane 27.665 no feto 27.299.
Jornalista: Natalino Belo
Editór: Xisto Freitas da Piedade
