KOVALIMA, 06 Maiu 2026 (TATOLI)-Diretora Servisu Edukasaun Kovalima, Elda de Fátima, hateten tuir planu iha tinan oin sei konstrui tan eskola pre-eskolár iha munisípiu Kovalima tanba númeru labarik sira barak la asesu prosesu aprendizajén iha pre-eskolár.
“Tuir ami-nia observasaun inan-aman sira iha koñesimentu di’ak lori oan-sira asesu ba edukasaun pré-eskolár maibé distànsia eskola mak dook husi hela fatin,” Nia informa ba TATOLI iha Santa Rosa, ohin.
Tuir dadus Ministériu Edukasaun (ME), liuhosi Edukasaun Kovalima konstrui ona eskola pré-eskolár hamutuk 44, maibé iha fatin balun labarik sira barak labele asesu tanba distansia dook husi komunidade nia hela fatin, nune’e iha tinan oin persiza atu aumenta pre-eskolár.
Husi pre-eskolár 44 ne’e ho totál estudante 2016 no sira ne’ebé sai benefisiáriu ba programa merenda eskolár hamutuk 2.051.
Iha sorin seluk Aman Husi estudante pre-eskolár, João da Costa, dehan prosesu aprendizajén hahú husi nivél pre-eskolár importante oinsá atu eduka labarik sira hahú kedas ho tinan kiik.
“Ha’u hanesan inan-aman polítika Ministériu Edukasaun (ME) lori oan sira asesu edukasaun hahú pré-eskolár ne’e di’ak nune’e bainhira labarik sira ba ensinu báziku ba primeiru siklu ne’e sira iha ona koñesimentu di’ak,”nia dehan.
Jornalista:Celestina Teles
Editór: Florencio Miranda
