BOBONARU, 06 Maiu 2026 (TATOLI) – Xefe Suku Ritabou, Postu Administrativu Maliana, Munisípiu Bobonaru, Maximiano dos Santos Araujo, husu ba Governu liuhusi Autoridade Munisípiu Bobonaru atu tau atensaun hodi orienta empreza konstrutora Bia Basan Mogen Unipesoál Lda aselera projetu irrigasaun Genumatan ne’ebé to’o agora seidauk remata tuir kalendáriu tinan 2025.
Maximiano hatete katak iha Suku Ritabou iha projetu rua, no ida de’it mak remata ona, maibé projetu irrigasaun Genumatan sei hela 20% mak seidauk konklui.
Maximiano haktuir, kondisaun ida-ne’e halo natar-na’in sira hasoru difikuldade atu hala’o atividade agrikultura, liuliu iha tempu ne’ebé presiza bee atu prepara natar.
“Iha Dezembru, natar-na’in sira hakarak tama ona ba natar, maibé tanba irrigasaun seidauk remata, ami buka dalan atu rezolve problema ne’e. Agora ami uza sistema manuál atu hasa’e bee ba natar,” nia katak.
Maske uza dalan manuál, xefe suku ne’e haree katak, hare iha balu natar komesa tasak ona no balu isin sai di’ak, ho esperansa katak iha fulan ida oin mai bele halo kolleta ona hare époka udan nian.
Hafoin kolleta époka dahuluk, líder komunitária sira sei rekomenda ba Prezidente Autoridade Munisípiu Bobonaru atu fó atensaun boot ba asuntu ne’e, nune’e bele kontinua no konklui lalais projetu irrigasaun Genumatan.
Iha fatin seluk, Diretór Planu Dezenvolvimentu Integradu Munisipál (PDIM), Rui Bere Mau, esplika, iha tinan 2025, Autoridade Munisípiu Bobonaru iha projetu hitu, ne’ebé lima mak remata 100% ona no hela de’it prosesu pagamentu retensaun 10%.
Nia subliña, projetu irrigasaun Genumatan agora iha progresu fíziku 80% no hela 20%.
Projetu ne’e paradu hela tanba klima, udan la fó fatin no kestaun seluk mak laiha dalan asesu atu kompañia mobliza materiál lokál no fabrikadu ba fatin projetu tanba natar-na’in seidauk kolleta hare époka dahuluk tinan 2025-2026.
“Sé maiu ne’e kuandu udan para ona no ema ko’a hare ona, nia bele kontinua finaliza ita bele halo pagamentu 100%,” nia konklui.
Autoridade Munisípiu espera katak kondisaun tempu sei fó oportunidade atu kontinua serbisu no remata projetu ne’e iha tempu badak, atu nune’e bele ajuda natar-na’in sira hasa’e produsaun agrikultura iha área ne’e.
Obra ne’e konstrui ho orsamentu Planu Dezembolvimentu Integradu Munisipál (PDIM) tinan 2025 ho valór kontratu $229,429.35, hahú iha fulan-Abríl no remata iha fulan setembru 2025 liubá, maibé la konsege no hetan estensaun ba fulan rua tán.
Autoridade Munisípiu Bobonaru deside kontrui irrigasaun ne’e atu fasilita agrikultór sira hasa’e produsaun hare hodi responde ba nesesidade doméstika Bobonaru nian no irrigasaun ne’e sei fornese bee ba natar purvolta esktare 400-resin
Jornalista: Sergio da Cruz
Editór: Evaristo Soares Martins
