VIKEKE, 07 Maiu 2026 (TATOLI)—Prezidente Autoridade Munisípiu Vikeke, Francisco C. S. de G. Soares, informa merkadu Olobai empreza konkluidu ona nia reabilitasaun no tempu badak sei muda vendedór sira bá merkadu ne’e.
“Kona-ba obra merkadu Olobai daudaun ne’e ramata ona servisu fíziku nian. Maibé, ita sei kompleta bee ba merkadu, atu negosiante sira muda bá ne’ebá uza de’it. Depoiz ita kompleta hotu tiha, iha tempu badak ita sei muda negosiante sira husi merkadu tuan bá merkadu Olobai,” Francisco C.S de G. Soares ba TATOLI iha Postu Vikeke Vila, Kinta ne’e.
Nia haktuir merkadu Olobai bainhira funsiona ona sei tau regra ida katak negosiante sira bá fa’an iha merkadu laran to’o lokraik fila bá uma.
“Ita-nia merkadu ne’e atu fó oportunidade ba ita-nia negosiante sira buka moris hodi hadi’a ekonomia família ni’an. La’os ba hela fali iha merkadu laran. Merkadu ne’e sei fó ba negósiu produtu lokál no produtu sira seluk,” nia akresenta.
Projetu reabilitasaun merkadu Olobai ne’ebé lokaliza iha área Wesa, Suku Karaubalu, Postu Vikeke Vila, gasta orsamentu munisipál tinan 2025 nian ne’ebé liuhusi Diresaun Planu Dezenvolvimentu Integradu Munisipál (PDIM) ho totál $273.951,88 ne’ebé konstrui husi empreza Caniela Unipessoal, Lda.
Antes ne’e, Diresaun Jestaun Merkadu no Turizmu Munisípiu Vikeke rejista ona negosiante sira iha merkadu antiga hamutuk 140-resin.
Jornalista: Vitorino Lopes da Costa
Editór: Xisto Freitas da Piedade
