DILI, 08 Maiu 2026 (TATOLI)—Primeiru-Ministru, Kay Rala Xanana Gusmão, konsidera ASEAN la’ós de’it nu’udár plataforma bá kooperasaun rejionál, maibé mós nu’udár enkuadramentu governasaun, sai padraun no norma sira-ne’ebé bele ajuda liután país membru sira-nia instituisaun sira, diversifika ekonomia iha nivel rejionál no globál.
“Timor-Leste komprometidu atu sai membru ASEAN ne’ebé konstrutivu no responsável no sei apoia tomak esforsu sira harii komunidade iha rejiaun ne’ebé kontribui ba dame, estabilidade no prosperiedade,” Primeiru-Ministru, Xanana Gusmão, hateten iha enkontru reuniaun bilaterál ho nia omólogu Primeiru-Ministru Repúblika Sosialista Vietname, Le Minh Hung, iha salaun enkontru Bougainvillea, Shangrilla Mactan, Cebu, Filipina, Kinta (07 Maiu 2026).
Tanba ne’e, Xefe Governu hato’o agradesimentu ba Primeiru-Ministru Repúblika Sosialista Vietname, Le Minh Hung, ne’ebé fó konvite hodi vizita nasaun Vietname iha tempu besik.
“Ha’u hakarak hato’o apresiasaun no onra boot ida bá ita-boot tanba konvida ona ha’u hodi hala’o vizita ofisiál ba Vietname,” PM Xanana apresia.
Xanana Gusmão kontente atu vizita nasaun furak ne’e hodi partisipa mós iha fórum Futuru ASEAN bá dala-tolu nu’udár oradór prinsipál, plataforma importante ida atu avansa diálogu kona-bá prioridade rejionál sira-ne’ebé fahe.
Nia hein katak ho vizita ne’e sei reflete relasaun ne’ebé metin no buras entre Timor-Leste no Vietname ne’ebé hari’i ona iha respeitu mútuo, kooperasaun no aspirasaun ne’ebé fahe bá pás, estabilidade no prosperidade iha ASEAN.
Timor-Leste apresia tebes ho kooperasaun ne’ebé hala’o ho Vietname iha área edukasaun no kapasitasaun rekursu umanu, asisténsia téknika no fó bolsa estudu ba timoroan sira.
Timor-Leste konsidera kooperasaun sira-ne’e nu’udár mós fatór ida iha prosesu Timor-Leste nian to’o sai membru plenu ASEAN bá da-11.
Jornalista : Alexandra da Costa
Editór : Cancio Ximenes
