BAUKAU, 11 Maiu 2026 (TATOLI)—Autoridade Protesaun Sivíl (APC-sigla portugeza) Munisípiu Baukau konsidera kazu inséndiu ne’ebé akontese maioria kauza husi sirkuitu eletrisidade tanba fiu instalasaun laiha kualidade.
Komandante Operasaun APC Munisípiu Baukau, Francisco Viana Freitas esplika kazu referidu akontese tanba maioria komunidade abandona uma no la kontrola eletrisidade antes sai husi uma ba halo atividade iha toos no natar.
“Ita suspeita sirkuitu eletrisidade ne’e akontese tanba fiu sira-ne’e laiha kualidade entaun fiu manas sirkuitu hodi hamosu inséndiu,” Francisco hateten iha ninia kna’ar fatin, Vila Antiga, Segunda ne’e.
Viana relata dezastre naturál tipu inséndiu bainhira akontese difísil atu salva sasán iha uma-laran inklui animál no fatór distánsia inklui ekipamentu husi Korpu Bombeiro mós limitadu nune’e bainhira to’o iha fatin akontesimentu kuaze maioria uma estragu ona.
Aleinde ne’e, APC liuhusi identifikasaun iha terrenu nota kondisaun uma fásil mosu inséndiu tanba maioria sei utiliza materiál tradisionál inklui fiu eletrisidade no instalasaun laiha kualidade.
“Kuandu sai husi uma di’akliu hamate kontadór eletrisidade nune’e labele hamosu sirkuitu,” nia sujere.
Entretantu, APC Baukau rejista kazu dezastre naturál hamutuk 25 iha-ne’ebé inséndiu hamutuk lima kompostu husi fulan-Abríl hamutuk tolu no inísiu fulan-ne’e rua hanesan iha Postu Administrativu Baguia kazu ida, Vemasse ida, Venilale ida, Matebian ida no Postu Administrativu Baukau Vila ida.
Jornalista: Natalino Belo
Editór: Xisto Freitas da Piedade
