KOVALIMA, 12 Maiu 2026 (TATOLI)-Ministériu Solidaridade Sosiál no Inkluzaun servisu hamutuk ho Banku Nasionál Komérsiu Timor-Leste (BNCTL), daudaun ne’e finaliza ona prosesu pagamentu subsidíu idozu no invalidéz faze dahuluk nian ba benefisiáriu hamutuk 7.218 ho totál orsamentu $ 1.638.560,00.
Koordenadór Deskonsentradu INSS Kovalima, Benardino Sequeira, hateten prosesu pagamentu faze dahuluk nian hahú ona iha fulan-Marsu 2026 ba benefisiáriu husi postu administrativu hitu iha Kovalima mak hanesan Suai, Fatululik, Fatumean, Fohorem, Maukatar, Tilomar no Zumalai.
“Bazeia ba dadus ne’ebé mak iha ita-nia benefisiáriu idozu no invaliéz iha munisípiu Kovalima hamutuk 7.218 husi númeru ne’e idozu hamutuk 6.843 no dadus invalidez hamutuk 375,”nia relata ba jornalista sira iha Salaun AMC, tersa ne’e.
Hosi totál dadus idozu 6.843 fahe ba kategoria tinan 60 to’o 69 hamutuk 2.019, feto 1.074 no mane 945, tinan 70 to’o 79 hamutuk 3.365 kompostu husi feto 3.059 no mane 1.306.
Idozu ho tinan 80 to’o 100 hamutuk 1.459 kompostu husi mane 658 no feto 801.
Jornalista:Celestina Teles
Editór: Florencio Miranda Ximenes
