DILI, 12 Maiu 2026 (TATOLI)–Ministru Interiór, Francisco da Costa Guterres, prefere forma uluk ekipa juri molok anúnsia rekrutamentu membru foun Polísia Nasionál Timor-Leste (PNTL).
“Ita komesa konstitui ona, ita bolu dehan komisaun ofisiál dejuri na’in-hitu, Polísia na’in-rua husi Austrália, Polísia Portugal na’in-rua no Funsaun Públika na’in-ida. Ne’ebé sira na’in-hitu mak sei konstitui hitu ba reteste ida-ne’e,” Ministru Interiór, Francisco da Costa Guterres, hato’o ba Jornalista sira iha ninia knaar fatin, Vila-Verde, Tersa ne’e.
Nia dehan, komisaun dejuri ne’e sei kompostu husi Polísia ho deviza Komisáriu Asistente ida no Superintendente Xefe ida, Guarda Nasionál Repúblikanu (GNR) sei reprezenta husi Ofisiál na’in-rua, Polísia Austrália sei reprezenta husi ofisiál Polísia Austrália na’in-rua no Komisaun Funsaun Públika (KFP) sei repzenta husi Komisáriu ida.
“Semana ne’e ita sei konstitui komisaun dejuri ba vaga rekrutamentu membru PNTL foun hodi fó reteste kandidatu sira,” nia akresenta.
Notísia relevante : Komisaun Rekrutamentu PNTL rejista aplikante na’in-400 hato’o rekursu ba MI
Ministériu Interiór sei kolabora ho KFP atu halo reteste ba kandidatu vaga rekrutamentu membru PNTL foun liuliu ba prova kulturál.
“Prova kulturál ne’ebé mak ita halo, ita sei husu ajuda ba Funsaun Públika atu uza dijitalizasaun ka atu uza sira-nia sistema dijitalizasaun para ita hatene sé mak hela ona, ne’e laiha tan muda tun muda sa’e, sé enkuantu o muda, entaun baku rahun tiha komputadór ne’e mak foin muda,” nia katak.
Governante ne’e konsidera, ho maneira ne’e, bainhira teste hotu kandidatu bele hatene kedan rezultadu teste ne’e liu ka la liliu.
Enkuantu, prova kulturál sei hakat ba psikoteste ne’e husi Polísia Austrália no GNR Portugal mak fó no kuandu kandidatu pasa iha faze ida-ne’e mak foin pasa ba teste saúde hodi hetan ema 400.
Ministru dehan, ema na’in-400 bainhira liu prosesu ne’e Governu sei haree hodi rekruta tan membru hodi atinje númeru 750.
“Sekretariadu ba Komisaun Rekrutamentu ne’e foun hotu laiha ema tuan. Ha’u fiar tanba sira ne’e ema foun sira ne’ebá ne’e hothotu tuir ha’u-nia haree ema ne’ebé mak iha edualidade, ema ne’ebé mak iha duni profisionalizmu, ita bolu dehan halo prosesu ho di’ak,” nia tenik.
Rekrutamentu vaga membru PNTL foun sei anúnsia iha fulan Maiu ne’e.
“Ha’u fiar katak sei laiha irregularidade tanba prosesu ne’e ita haree ona ita kompreende tiha, ita la’o hela ne’ebé ita hatene ona, Polísia mós apreende ona lisaun ida-ne’e sei la halo tan,” nia hato’o.
Ministru Interiór sei fó sai diploma mimisteriál hodi kontempla regra sira kona-ba vaga rutamentu membru PNTL foun.
Jornalista : Natalino Costa
Editora : Julia Chatarina
