VIKEKE, 19 Maiu 2026 (TATOLI)—Selebrante misa agradesimentu ba Loron Restaurasaun Independénsia ba da-24 (20 Maiu 2002-20 Maiu 2026), Pe. Arlindo Leonardo Sequeira da Silva, hateten Loron Restaurasaun Independénsia sai fundamentu ba ukun rasik-an.
“Prosesu ukun rasik-an ne’e liuhusi prosesu lubuk ida, dezde okupasaun Portugál iha tinan 1515 tama Timor no to’o 1975 Indonézia invade tan Timor, povu barak mak hetan terus no balun lakon vida. Iha tinan 1999 liuhusi prosesu demokrasia mak povu ida-ne’e deside nian destinu ba ukun rasik an. Nune’e, iha loron 20 Maiu 2002, ofisialmente Timor Leste sai nasaun independente,” Pe. Arlindo hateten iha misa agradesimentu iha Igreja Nossa Senhora Imaculada da Conceição, Postu Vikeke Vila, Tersa ne’e.
Padre dehan ukun rasik an ne’e timoroan sira presiza tau iha neon no konxiénsia ba rai ida-ne’e, iha tempu liberdade nian laran.
“Tan ne’e, ha’u husu timoroan sira tau ona sentru iha ita-nia kabaas, moris hanesan nasaun ida maibé todan liu fali luta ba independénsia. Tanba ne’e, ba sidadaun sira hotu toma responsabilidade ba rai ida-ne’e, ezije kualidade timoroan atu reza ba Timor ida di’ak hodi husu bensaun Na’i Maromak nian,” nia subliña.
Nune’e, nia husu sidadaun sira fó kontribuisaun ba rai ida-ne’e, atu povu ida-ne’e bele moris di’ak iha independénsia ida-ne’e tanba nasaun ne’e ema barak mak sai terus no lakon vida iha tempu okupasaun.
Hafoin misa ramata, Komisaun Organizadora Loron Restaurasaun Independénsia, Marito da Costa, hato’o agradesimentu ba padre selebrante no povu Munisípiu Vikeke ne’ebé partisipa iha misa agradesimentu ida-ne’e tanba loron restaurausaun sai importante tebes ba povu Timor-Leste.
“Hanesan ita hotu hatene loron 20 Maiu sai loron ne’ebé istóriku ba povu Timor Leste. Tan ne’e，ita konsidera loron ida-ne’e sai loron importante ba ita-nia nasaun Timor-Leste,” nia hato’o.
Entretantu, misa agradesimentu ba Loron Restausaun Independénsia ne’e partisipa husi Prezidente Autoridade Munisípiu Vikeke, Komadante Polísia Nasionál Timor-Leste (PNTL) Munisípiu Vikeke, veteranu, funsionáriu, estudante no populasaun Munisípiu Vikeke. Hafoin misa ramata, sarani sira kontinua lori ai-funan no lilin ba Jardín Eroi Kraras.
Jornalista: Vitorino Lopes da Costa
Editór: Xisto Freitas da Piedade
