DILI, 19 Maiu 2026 (TATOLI)–Reprezentante husi Emiraidu Árabe Unidu (EAU) hala’o enkontru ho Prezidente Repúblika, José Ramos-Horta, hodi diskute kona-ba kooperasaun bilaterál no hametin relasaun entre nasaun rua ne’e liuliu iha área dezenvolvimentu edukasaun no kapasitasaun rekursu umanu.
Embaixadór EAU, Abdulla Salem AIDhaheri, hato’o mós kumprimentu husi Prezidente (EAU), Sheikh Mohamed bin Zayed Al Nahyan, ba Xefe Estadu no povu Timor-Leste ne’ebé sei selebra tinan 24 Restaurasaun Independénsia iha loron 20 Maiu.
“Ami iha ne’e atu selebra Loron Independénsia, maibé mós atu tuir serimónia primeira pedra ba konstrusaun akomodasaun ba estudante feto sira-ne’ebé sai nu’udar doasaun husi Emiraidu Árabe Unidu,” Abdulla dehan hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin,
Nia dehan, EAU nafatin apoiu Timor-Leste hodi harii asrama ba estudante timoroan sira-ne’ebé sei lansa iha loron 20 Maiu, hanesan sinál kompromisu EAU nian atu dudu setór edukasaun iha Timor-Leste.
Aleinde ne’e, parte rua mós diskute kona-ba programa formasaun ba diplomata timoroan sira ne’ebé sei hala’o iha Anwar Gargash Diplomatic Academy.
“Ami hein katak formasaun ne’e bele hala’o iha trimestre datoluk ka dahaat tinan ne’e nian. Ita sei asina mós Nota de Entendimentu (MOU) ida molok hahú programa ne’e,” nia esplika.
Iha vizita ne’e, ekipa husi UAE mós sei observa no avalia projetu sira seluk iha kapitál Dili laran. Diplomata ne’e mós subliña katak nasaun rua sei kontinua buka oportunidade kooperasaun iha área estratéjiku sira seluk hanesan infraestrutura no turizmu.
“Ita iha relasaun ne’ebé di’ak tebes entre parte rua ne’e, no ha’u fiar katak relasaun ne’e sei lori rezultadu ne’ebé di’ak ba futuru,” nia dehan.
Jornalista : Hortêncio Sanchez
Editor : Cancio Ximenes
