DILI, 19 Maiu 2026 (TATOLI)—Eis Primeiru-Ministru no Líder istóriku, Marí Alkatiri, husu ba kbiit polítiku sira atu buka alternativa governasaun ne’ebé di’akliu hodi responde ba dezafiu foun sira iha Timor-Leste.
Fundadór hato’o mensajen ne’e iha ámbitu Selebrasaun Aniversáriu Restaurasaun Independénsia RDTL ba da-24, ho reflexaun kona-ba dezenvolvimentu nasionál ne’ebé tuir nia haree, seidauk lori mudansa signifikativu ba povu ki’ik sira.
Alkatiri hateten maski Estadu gasta ona dolar biliaun ba biliaun ba dezenvolvimentu, maibé povu maioria seidauk sente benefísiu ekonómiku ne’ebé loos.
“Kuaze 48% hosi populasaun moris iha mukit laran. Ne’e labele kontinua,” Eis-Primeiru Ministru Mari Alkatiri ba jornalista sira iha nia kna’ar fatin, Tersa ne’e.
Nia akresenta katak durante tinan 24 independénsia, iha ona progresu importante, maibé dezafiu boot seidauk rezolve, liuliu kona-ba inkluzaun polítika no ekonómika ba komunidade iha baze.
Alkatiri mós lembra krize polítika no sosiál iha tinan 2006 no 2008, no husu atu iha entendimentu estratéjiku hodi mantein pás no estabilidade nasionál.
Nia mós lansa vizaun ida kona-ba plataforma interjerasionál ne’ebé inkluziva no aberta ba ema hotu, ho objetivu atu evita diskriminasaun bazeia ba relijiaun, rasa ka opsaun moris.
Tuir nia, tranzisaun podér no governasaun iha futuru labele limita de’it ba alternánsia polítika, maibé tenke lori alternativa ida-ne’ebé efetivu no di’akliu ba dezenvolvimentu nasionál.
Atuál Sekretáriu Jerál FRETILIN ne’e husu deskulpa ba sidadaun sira-ne’ebé karik ladún simu di’ak ninia liafuan, maibé nia afirma katak buat hotu ne’ebé nia hato’o mai hosi laran nu’udár responsabilidade ida hanesan fundadór ida husi FRETILIN no RDTL.
Jornalista: Osória Marques
Jornalista: Xisto Freitas da Piedade
