DÍLI, 19 Maiu 2026 (TATOLI) — Embaixadór Emiradu Árabe Unidu (UAE) Abdulla Obaid Salem AlDhaheri vizita Sekretariadu g7+ iha Dili, ho objetivu hodi hametin kooperasaun no diskute esforsu koletivu ba promosaun paz no estabilidade globál.
Iha enkontru ne’e, Embaixadór UAE hateten katak vizita ne’e bazeia ba proposta husi Prezidente Repúblika José Ramos-Horta ba Governu UAE, hodi haree oinsá bele fó apoiu ba servisu g7+, liuliu iha promosaun paz no estabilidade iha nível globál.
“UAE prontu ajuda g7+ hodi promove pas no estabilidade iha nivel global,” Embaixadór Abdulla Obaid Salem AlDhaheri dehan ba jornalista sira iha edifísiu g7+, Palásiu Governu, Dili, ohin.
Sekretáriu-Jerál g7+ Helder da Costa dehan katak prezensa Embaixadór UAE iha g7+ ne’e hodi halo diskusaun kona-ba kooperasaun mutua ne’ebé sei kontinua iha futuru hodi kontribui ba pas no estabilidade.
“Iha oportunidade ida ne’e, hau lori Governu Timor-Leste no g7+ nia naran, fó solidaridade ba UAE ne’ebé foin lalais hetan atake bombardeamentu husi Iraun,” dehan Helder da Costa.
Embaixadór UAE no delegasaun sira-nia prezensa iha Timor-Leste hodi partisipa iha selebrasaun aniversáriu Restaurasaun Independénsia ba dala-24.
Nune’e mós, sei hala’o lansamentu fatuk-dahuluk ba konstrusaun dormitóriu ba joven feto sira, ne’ebé sei realiza iha 20 Maiu 2026.
Projetu ne’e lokaliza iha área Palásiu Prezidente nia sorin no sei finansia husi Governu UAE ho forma gratuita.
“Ita agradese tanba Governu UAE sei konstrui dormitóriu ba joven feto sira ho gratuita. Konstrusaun ida ne’e realiza tanba proposta husi Prezidente Repúblika José Ramos-Horta iha tinan hirak liu ba,” nia dehan.
Jornalista: Camilio de Sousa
Editór: Filomeno Martins
