DILI, 20 Maiu 2026 (TATOLI)-Prezidente Parlamentu Nasionál (PPN), Maria Fernanda Lay, apela ba polítiku sira atu hamutuk hodi lori dezenvolvimentu no hadi’a moris povu nian iha Timor-Leste.
Apelu ne’e nia hato’o iha ámbitu komemorasaun Loron Restaurasaun Independénsia ba da-24 ho tema “Hamutuk ita harii pátria ida-ne’ebé justa, inkluziva no reziliente liután”.
“Husi tema ne’e, bolu ita hotu atu hamutuk, maski iha eleisaun partidu ketaketak, maibé iha finalidade ida ba Estadu. Ita tenke hamutuk atu promove dezenvolvimentu ekonómiku”, nia hateten hafoin partisipa iha komemorasaun Loron Restaurasaun Independénsia iha Tasi-Tolu, ohin.
Nia dehan kona-ba ba asuntu interese nasionál hanesan Projetu Greater Sunrise, no fó apresiasaun ba Governu Dasiak, tanba kontinua halo esforsu no serbisu sira durante períodu ida-ne’e.
“Espera ita-nia mensajen ida de’it ho país viziñu Austrália, katak pipeline Greater Sunrise mai Timór”, afirma.
Líder órgaun lejizlativu ne’e observa katak durante tinan 24 independénsia, Timor-Leste hetan progresu iha área infraestrutura no seluk tan, maski sei hasoru dezafiu balun, maibé Governu kontinua buka solusaun faze ba faze.
Iha biban ne’e, nia husu ba foinsa’e sira atu kontinua aprende no prepara an tanba país sai ona membru Asosiasaun Nasaun Sudeste Aziátiku (ASEAN, sigla inglés). Tuir nia, Timor-Leste sei enfrenta dezafiu tanba nu’udar país joven liu organizasaun rejionál ne’e.
“Ha’u husu liuliu ba ita-nia joven sira, aprende língua no halo diplomasia iha ASEAN rasik. Ohin, Prezidente Repúblika hato’o katak sai membru ASEAN, ita iha dezafiu oioin, más oinsá bele haree oportunidade entre dezafiu, buka oportunidade seluk, ita partilla esperiénsia Timor-Leste nian, neste momentu ho país ASEAN”, nia realsa.
Fernanda Lay apela mós ba foinsa’e sira atu hametin pás iha rai-laran. “Mensajen ha’u-nian ba joven sira, baku-malu ita la manán buat ida. Se bele promove pás entre ita-nia populasaun sira, hanesan meiu komunikasaun di’ak entre joven para ita iha estabilidade polítika, bele dezenvolve ekonomia Timor-Leste iha seiu ASEAN ninian”, katak
Jornalista: Nelson de Sousa
Editora: Maria Auxiliadora
