DILI, 21 Maiu 2026 (TATOLI) – Índise Presu Konsumidór (IPK) fulan-Abríl rejista deflasaun 0,8%, kompara ho Marsu iha inflasaun 0,6%.
Tuir dadus Institutu Nasionál Estatístika Timor-Leste (INETL), mudansa presu iha rupu hotu tun 0,8%, tanbá hetan kontribuisaun husi grupu hahán no bebida la’os alkólika 1,2%, alkohol no tabaku 2,6% no ekipamentu no manutensaun mobiláriu uma-laran 0,6%.
Nune’e, grupu transporte sa’e 3,2%, hatais no sapatu sa’e 0,6%, no uma sa’e 0,3%, sai hanesan mudansa kontráriu ba inflasaun mensál grupu hotu.
“Grupu hahán no bebidas la’ós alkólika tun 1,2% tanba hetan impaktu maioria husi subgrupu modo-tahan 5,3%, ikan no hahán tasi 1,1%, ai-fuan 2,3%, mina no bokur 0,4% no naan 0,1%”, dokumentu ne’e hateten.
Iha subgrupu kafé, xá no kokoa sa’e 2,7%, masin midar, marmelada, bani-been, xokolate no hahán midar 0,5%, produtu ai-han 0,4%, no susun-been, keiju no manu-tolun 0,4%, ida-ne’e sai hanesan mudansa kontráriu ba inflasaun grupu hahán no bebida la’ós alkólika ba Abríl 2026.
Mudansa persentajen IPK anuál tun 0,1%, kompara entre fulan-Abríl 2026 no Abríl 2025, hetan kontribuisaun husi grupu hahán no bebida la’ós alkólika tun 0,3%, alkoól no tabaku 2,2%, ekipamentu no manutensaun mobiláriu uma-laran 0,3%, komunikasaun 0,3% no rekreasaun no kultura 0,6%, ba anuál Abríl 2026.
Entretantu grupu transporte sa’e 5,4%, edukasaun 0,3% no hatais no sapatu 0,6% sai hanesan mudansa kontráriu ba inflasaun grupu hotu ba anuál Abríll 2026.
Kona-ba inflasaun tradeable tun 1,1% no non-tradeable mós tun 0,1% iha mensál, kompara ho fulan-Abríl 2026 no Marsu 2026. Inflasaun tradeable tun 0,4% no non-tradeable sa’e 0,7% iha anuál kompara ho fulan-Abríl 2026 no Abríl 2025.
Notísia relevante: Marsu rejista inflasaun 0,6%
Jornalista: Arminda Fonseca
Editora: Maria Auxiliadora
