DILI, 25 Maiu 2026 (TATOLI)–Boxista timoroan, Francisco da Silva Soares, ne’ebé koñesidu ho naran Maulai, sente orgullu tanba ba dahuluk kompete iha rai-li’ur hasoru adversáriu iha Vietname no bele lori vitória mai Timor-Leste.
“Ha’u sente orgullu tebes primeira vez ba kompete iha ema-nia rai Vietname, maski durante ne’e ha’u hanoin atu ba kompete iha rai-li’ur duni, husi esforsu klubu ne’e iha fallansu barak maibé ami kontente nafatin bele kompete iha ema-nia rai hodi lori tan vitória mai Timor-Leste,” Francisco da Silva Soares hateten ba Ajénsia TATOLI iha Thomas Américo, Vila-Verde, Segunda ne’e.
Nia haktuir, durante nia kompete iha Vietname nia hetan ajuda entidade oinoin.
“Foin daudaun ha’u ba kompete ne’e tanba hetan ajuda husi família sira, husi maun-alin, kolega sira tantu iha laran nomós rai-li’ur hodi kompete iha ema-nia rai no ha’u mós sedauk kontaktu husi entidade balun,” nia akresenta.
Tuir boxista ne’e, atividade boxe ne’e hanesan talentu ida atu dezenvolve-an sai atleta profesionál, nune’e tenke kontinua mantein preparasaun maski laiha eventu.
Notísia relevante : Assanami husu Boxista Delio Mouzinho labele lakon esperansa
“Hanesan ami boxista ne’e ami mantein nafatin ami-nia preparasaun maski laiha eventu, kuandu iha fali eventu hasoru saida de’it, ha’u sai boxista ne’e hanesan talentu ida,” nia katak.
Francisco da Silva hahú envolve-an iha atividade desportiva ne’e iha tinan 2023 no tama ba nível profisionál iha tinan 2023, nune’e hala’o fali profisionál ne’e iha tinan 2024, manán dahuluk iha klubu Thomas Americo, ba daruak nian iha Vietname.
Nune’e, nia husu ba juventude no atleta sira ne’ebé sei kompete iha eventu 23 Maiu atu kontinua esforsu, disiplina no treinu ho seriedade.
“Ha’u-nia mesajem ba kolega sira ne’ebé atu kompete iha kompetisaun sira, ita atu sai atleta ne’e tenke esforsu maka’as, disiplina no treinu, maski iha ita-nia Timor-Leste ne’e boxing seidauk la’o ho di’ak, ami nafatin esforsu no lori ita-nia boxista sira hodi ba kompete iha ema-nia rai no ha’u-nia lia menon ba Governu mak tau-matan netik ba ami boxing sira,” nia fó hanoin.
Iha fatin hanesan, Treinadór Klubu Thomas Americo Boxing Promotion (TABP), Alex Barreto, hateten, durante preparasaun ba kompetisaun iha Vietname, klubu fornese fasilidade no ekipamentu balun ba atleta sira atu uza durante treinamentu hodi prepara fizíku no mentalidade.
“Kuaze atleta sira foun ne’e nia mentalidade seidauk di’ak durante ami treinu atu kompete iha rai-li’ur,” nia katak.
TABP prepara atleta na’in-rua hanesan Francisco da Silva soares (Maulai) no Damas ba eventu iha Vietname. Iha kompetisaun ne’e, Damas lakon, maibé Francisco Maulai konsege sai kampiaun no lori vitória ba Timor-Leste iha klase Walter 67Kg.
Alex Barreto haktuir, durante hasoru atleta Vietname sira, nia haree diferensa boot iha preparasaun no kondisaun atleta sira.
“Jogu hasoru ema rai-na’in Vietnam duni ita haree ema-nia preparasaun, sira-nia kondisaun kuaze sira konsumu buat hotu-hotu ita haree avansadu,” nia katak.
Maski Timor-Leste seidauk iha kondisaun hanesan rai seluk, maibé nia orgullu tanba atleta timoroan sira bele kompete iha nível internasionál no manán iha rai Vietnam rasik.
“Ita timoroan, ita la espekta maibe ita mós kompete iha nível internasionál, iha nível kiikoan maibé ita orgullu tebes ne’ebé mak manán iha ema-nia rain hasoru ema rai-na’in Vietname rasik,” Alex Barreto, hato’o.
Nia apresia ho Francisco Maulai nia esforsu liuhusi prosesu treinamentu difísil no halo esforsu boot durante treinu konsege hetan vitória.
“Ha’u agradese ba Maulai, ne’ebé liuliu husi prosesu ne’ebé mak la halimar ha’u hatene sira hanesan atleta no atleta nia serbisu mak treinu no sira-nia sofrimentu iha treinu laran ema la hatene no atleta nia halai dadeer no meudia, maibé sira-nia kompetisaun boot ba sira-nia an rasik no hetan pasu ida-ne’ebé iha eventu sira ne’e,” nia katak.
Eventu tuir mai sei realiza iha loron 23 Maiu 2026 husi boxing profisionál Thomas Americo no preparasaun sei kontinua nafatin.
“Sai husi uma-na’in sei hala’o iha GMT, preparasaun ami-nia sei kontinua ho preparasaun ne’ebé iha,” informa Alex Barreto.
Alex Barreto dehan, Klubu Thomas Americo agora ativu ona durante tinan-rua no envolve iha atividade barak, inklui boxing amadora, profesionál no atividade barak demais. Amadora ne’e hanesan kompetisaun kiikoan sira maibé profesionál sira seidauk tama tanba sira seidauk iha experiénsia di’ak.
Biografia Boxista
Francisco da Silva Soares moris iha 28 Fevereiru 1999, hanesan oan dahuluk iha família ida ho ema na’in-neen no moris iha família simples iha Dili, Quintal Boot. Nia hahú nia edukasaun iha Eskola Kaikoli no depois liuhusi difikuldade barak durante krize, muda fali ba fatin seluk.
Depois ramata Ensinu Sekundáriu, Francisco la kontinua estudu tanba família nia kondisaun no momentu ne’ebá hahú serbisu atu ajuda inan-aman no alin sira.
Iha tinan 2021, nia hahú treinu boxing iha Scorpion Boxing Club iha Kintal Boot ho Treinadór Filomeno Correa no komesa kompete iha nível Amadora iha tinan 2023.
Francisco agradese ba família, kolega sira no apoiante sira iha Timor-Leste no rai-li’ur hanesan Inglatera, Portugal, Koreia, Izrael no Austrália ne’ebé fó apoiu ba nia durante nia hala’o atividade boxe. Nia mós agradese ba empreza no entidade sira ne’ebé ajuda nia, inklui Labylai, Achun28, EDELI AAA, Loja Bangunan Área Suku Santa Cruz no Scorpion Boxing Club.
Jornalista : Natalino Costa
Editora : Julia Chatarina
