BOBONARU, 25 Maiu 2026 (TATOLI) – Governu presiza aselera implementasaun projetu estrada trosu husi suku Lontas bá postu administrativu Lolotoe Vila, munisípiu Bobonaru, ho distánsia kilómetru 8,9, tanba udan durante semana ida-ne’e rezulta estrada barak mak hetan danus kauza husi rai-halai.
Tanba foin lalais Governu anunsiu ona katak empreza internasionál Jiangsu Ruiwo Construction Co.Ltd., husi Xina mak sai vensedora ba projetu ne’e ho totál orsamentu $11. 979. 831,30.
“Tempu bailoro ne’e bele mai halo lansamentu fatuk dahuluk para estrada ida agora monu durante udan semana ne’e, kompañia bele hadi’a provizóriu para ami bele liu bá-mai. Tanba parte Zulo-Il tesik mai foho hun sira atu bá Lolotoe Vila ne’e grave loos. Karreta liu susar tanba rai ho fatuk monu arbiru de’it”, membru komunidade Lolotoe Leopoldo Lopes dehan ba Tatoli, iha Maliana, segunda-feira ne’e.
Leonardo de Assis, joven Lolotoe mós husu bainhira udan para empreza bele lori materiál book daudaun ona projetu ba lansamentu fatuk. “Ami presiza tebes estrada ne’e di’ak, tanba tinan 20-resin ona Lolotoe koñesidu liu ho liafuan ida estrada aat ne’e”, nia dehan.
Tuir nia, kondisaun estrada ne’e afeta tebes ba atividade ekonómika, sosiál, liuliu implementasaun ba obra Programa Nasionál Dezenvolvimentu Suku (PNDS) no projetu seluk tan.
“Agora suku balun hanesan Lupál no Opa ne’e IGEADI tama dudu ona. Se la’e projetu labele la’o. Suku balun mós agora dalan monu. Ita atu bá trata dokumentu ruma iha postu Lolotoe mós susar”, nia dehan.
Administradór Postu Administrativu Lolotoe, Quintino Santos de Jesus, dehan provizoriamente karreta labele bá Lolotoe Vila, tanba estrada hetan danus iha pontu lima.
“Iha mota oan ida Moukou besik rate ne’e iha pontu lima mak labele liu. Pontu ida ladún grave tanba hadi’a ona. Grave iha fatin tolu, aban mak hadi’ak. Ha’u hasai ona sirkulár ida ba karreta na’in sira atu apoia tula rai para ami ho funsionáriu ho komunidade hadi’ak”, katak.
Kona-ba lansamentu ba projetu estrada referida, antigu Xefe Gabinete Prezidente Autoridade Munisípiu Bobonaru ne’e relata katak agora seidauk hetan informasaun eskrita husi Governu. “Maibé hein de’it. Ita espera akontese iha tempu badak”, nia salienta.
Postu administrativu Lolotoe iha suku hitu no aldeia 20, ho nia totál populasaun hamutuk 7.695 no xefe família 1.591.
Jornalista: Sergio da Cruz
Editora: Maria Auxiliadora
