VIKEKE, 26 Maiu 2026 (TATOLI)—Xefe Departamentu Peska Munisípiu Vikeke, Bendito Trindade, informa tempu badak sentru viveiru lokalizadu iha Suku Loihunu, Postu Administrativu Ossú, Munisípiu Vikeke, sei kolleta ikan nila tonelada rua-resin.
“Ikan ne’ebé ita husik iha Sentru Agikultura Loihunu boot ona ne’ebé ami haruka ona pedidu ba nasionál hodi kolleta. Ami hein de’it dezisaun husi nasionál bainhira mak sira mai kolleta ikan tanba Sentru Agrikultura Loihunu ne’e pertense ba Governu. Atu kolleta ne’e hein orientasaun husi Ministériu Agrikultura, Peska, Pekuária no Floresta (MAPPF) hafoin ita halo kolleta hodi fa’an ba konsumidór sira,” Bendito Trindade ba TATOLI iha Sentru Viveiru Loihunu, Tersa ne’e.
Bendito hatutan ikan nila ne’ebé haki’ak iha sentru ne’e nia durasaun fulan tolu ona, tanba ne’e tenke halo tiha kolleta hafoin husik fali nune’e redús gastu ba hahán.
“Ita agora observa ikan barak liu, entaun ninia hahán mós tenke barak, hodi fó han loroloron. Tan ne’e mak ami halo pedidu ba nasionál halo tiha kolleta. Se la’e ita lakon ba ninia hahán sira-ne’e,” nia klarifika.
Bendito esplika polítika MAPPF nian ba haki’ak ikan ne’e atu kombate mal-nutrisaun no ikan sira-ne’e Governu sei fa’an kada kilo ho presu $3,50.
“Dalabarak ita-nia komunidade tenke depende ba ikan tasi maibé liuhusi atividade sira-ne’e ita-nia komunidade bele sosa. Nune’e, ba programa kolleta ne’e, ami sei konvida komunidade hodi partisipa,” nia subliña.
Bendito relata Sentru Viveiru Loihunu antes ne’e kolleta ikan nila ba dala rua ona, iha-ne’ebé kolleta dahuluk tonelada ida ho nia orsamentu hamutuk $1.500,00 no kolleta daruak mós toneleda ida hetan $1.500,00.
“Tinan ida-ne’e kolleta tan entaun ba dala tolu ona. Husi reseita sira-ne’e ita kontribui ba kofre Estadu nian,” nia tenik.
Kona-ba dezafiu, Bendito haktuir, durante ne’e dezafiu ne’ebé Sentru Loihunu enfrenta mak hahán ba ikan no tempu bailoron bee menus impaktu ba ikan mate.
“Husi dezafiu sira-ne’e ami aprezenta ba ministériu relevante no ministériu mós hatene ami-nia situasaun sira-ne’e,” nia informa.
Tuir dadus, kolam ikan iha Sentru Loihunu hamutuk unidade 18 ho medida 20×10 kompostu husi kolam ba ikan oan no ikan boot nian.
Funsionáriu MAPPF ne’ebé destaka iha Sentru Viveiru Loihunu hamutuk na’in-haat (4) kompostu husi tékniku na’in-tolu (3) no seguransa ida.
Jornalista: Vitorino Lopes da Costa
Editór: Xisto Freitas da Piedade
