DILI, 28 Maiu 2026 (TATOLI)—Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten durante tinan 2025 to’o períodu daruak tinan-ne’e, MSSI apoiu ona foos no ai-han komplementár ba família vulnerável hamutuk 21.388 iha territóriu.
Hosi totál 21.388 kompostu husi xefe família hamutuk 18.557 ne’ebé hetan benefísiu iha 2025 no xefe família hamutuk 2.831 ne’ebé benefísia iha 2026 nian.
Pina Dias relata foos ne’ebé ekipa MSSI atribui ona hamutuk saka 48.250, ida-ne’e atribuisaun kontinuasaun hosi 2025 to’o 2026 nian hosi totál foos saka 51.000 no sei iha balansu 2.750, ho nia alokasaun orsamentu hamutuk rihun $150.
Diretór Jerál MSSI ne’e mós dehan aleinde fahe foos, iha mós koto no mina. Seluk mak la’ós ai-han hanesan kulisaun, biti, sabaun, rinso, pasta-nehan no seluk tan.
Nia esplika ema ne’ebé kategoria vulnerabilidade mak ema ho defisiénsia, eroi vivu (ferik-katuas). Maski ferik-katuas simu ona osan maibé nafatin apoiu ba ferik-katuas ne’ebé kbi’it laiha.
Aleinde ne’e, hosi foos ne’e apoiu mós ba família ne’ebé mate, tanba iha kondisaun balun ne’ebé sira laiha kbi’it, depoiz apoiu ba igreja ne’ebé bainhira halo atividade relijioza nian no mós apoiu ba eskola ka universidade ne’ebé halo atividade ruma kontestu animasaun. Enkuantu, apoiu dezastre naturál ne’e Sekretáriu Estadu Protesaun Sivíl mak oferese apoiu urjente.
“Tinan ne’e ita aloka ona osan maibé hein aprovizionamentu loke konkursu. Daudaun ne’e ita nafatin uza balansu foos saka 2.750 hodi apoiu ba família vulnerável,” nia dehan ba TATOLI iha nia kna’ar fatin, MSSI, Kaikoli, Dili, Kinta ne’e.
Iha tinan 2025, MSSI distribui ona ai-han komplementár no foos bá iha Munisípiu Aileu ho kuantidade sakola hamutuk 659, Ainaru iha sakola 150, Ataúru sakola 500, Kovalima sakola 603, Baukau sakola 2.455, Bobonaru sakola 2.661, Dili sakola 734, Ermera sakola 560, Likísa sakola 760, Lautein sakola 515, Manatutu sakola 1.436, Manufahi sakola 417, Oekusi iha sakola 1.648 no Vikeke sakola 500.
Jornalista: Osória Marques
Editór: Xisto Freitas da Piedade
