DILI, 06 Juñu 2026 (TATOLI) – AD Santo António konsege halo remontada impresivu hodi halakon Nagardjo ho rezultadu 3-2 iha jogu kontinuasaun Liga Futeból Timor-Leste (LFTL) époka 2026 ne’ebé realiza iha Estádiu Munisipál Dili, sábadu loraik ne’e.
Nagardjo ne’ebé lidera uluk vantajen 2-0 to’o ponteiru relójiu besik tuku 16h00, no adeptu sira hahú fiar ona katak ekipa ne’e sei manán. Maibé, AD Santo António responde ho hat-trick golu iha minutu 43, 53, no 63 hodi muda pontu no hasai Santo António husi derrota.
Golu tolu ne’e permite Santo António fila husi situasaun dezvantajen no garante vitória importante ida. Rezultadu ikus 3-2 hanesan remondata boot ida iha jogu ne’ebé Nagardjo domina iha parte dahuluk.
Hanesan ona kultura ba futeból, bainhira jogu atu hahú tenke hetan autorizasaun husi árbitru kuandu árbitu lian signifika jogu la’o ona iha kampu matak nia leten, no ponteiru relójiu iha treinadór, árbitru no komisaun jogu nian hahú la’o, husi minutu 01 ba to’o 45 no adisionál minutu haat.
Bainhira árbitu lian, jogadór sira husi ekipa rua hahú luta iha kampu. Bola la’o, jogadór sira lansa kontra-atake ba malu tuir tékniku no abilidade ekipa idaidak nian ne’ebé orienta ona husi kada treinadór.
Bola tebe bá-mai, husi ain ba ain, Santo António utiliza formatu jogu 4-3-3, enkuantu Nagardjo 3-5-2. Ekia rua halo presaun ba malu, bola halai husi jogadór sira-nian ain, halo adeptu sira iha tribun estádiu tuur la hakmatek no hakilar maka’as.
Nagardjo halo presaun, Santo António nakdoko. Jogu sai manas bainhira Nagardjo hatudu kedan sira-nia forsa no iha minutu 8, avansadu Richi Wally (10) aproveita bola livre husi klaran, hakat liu defeza, suta ho ain karuk – bola tama liu ba rede Santo António no pontu muda kedan ba 1-0.
Jogu la’o nafatin, maibé Nagardjo halo presaun aumenta liután no iha minutu 16, dezastre tan ba Santo António, bainhira bola kantu husi liman loos, Herman Yoku (6) haksoit aas liu ema hotu hodi hatama bola ba rede Santo António hodi muda rezultadu ba 2-0. Adeptu Nagardjo hakilar, lian domina liu tribun kompara ho adeptu Santo António.
Maski Nagardjo lidera ona jogu, Santo António la lakon enerjia atu luta. Jogadór sira kontinua koordena malu di’ak, treinadór Eduardo Pereira mós la nonook, kontinua orienta. Nune’e, iha minutu 43 bola kruza husi karuk, defeza Nagardjo Bernardino de Sena (12) tenta hasai bola, maibé bola kose nia ain tama fali ba nia rede rasik, autogolu, rezultadu muda fali ba 2-1. Ho pontu ne’e halo ba Santo António hahú moris antes tama ba intervalu.
Hakat ba segunda parte mak sorte di’ak ne’ebé monu ona ba Santo António basá treinadór Eduardo Pereira troka tátika, hatama Silveiro Garcia (27). Desizaun ne’e fó duni rezultadu pozitivu.
Jogu la’o to’o minutu 53, bainhira momentu desizivu ida akontese. Avansadu Silveiro Garcia lori bola tama ba área penalidade Nagardjo no tenta liuhusi defeza adversáriu. Defeza Nagardjo tentan halo blokeiu maibé tarde ona, tanba kontaktu iha ain Silveiro Garcia, halo nia monu iha área. Árbitru Bernardino Mascarenhas la demora atu foti desizaun. Nia, huu árbitu no aponta ba marka penalidade. Silveiro Garcia rasik simu responsabilidade atu ezekuta penalidade. Ho kalma no konfiansa, nia suta ba sorin loos, enkuantu guarda-rede Vicente Baredes (28) monu ba sorin seluk. Goluuu! 2-2. Estádiu nakonu ho lian adeptus sira-nian. Golu ne’e fó esperansa foun tan ba AD Santo António ne’ebé ikusmai muda kursu partida nian.
Maski empata ona 2-2, maibé Nagardjo la lakon esperansa, kontinua halo atake, maibé Eduardo Pereira muda ona estratejia fó hela susar boot ba treinadór Nagardjo Salomão Soares ne’ebé tenke fera kakutak atu muda estratéjia jogu hodi kombate Santo António nia jogu.
Jogu la’o manas liután, Nagardjo nia mentalidade blokeada. Minutu 63, kontra-atake lalais. Bola iha ain jogadór estranjeiru husi Santo António Emmanuel Ghanaian (11) hodi domina kampu, avansadu husi Ghana ne’e hatudu klase. Nia duni bola ho velosidade maka’as, liu defeza ida, suta maka’as husi área li’ur, bola tama liu rede Nagardjo no rezultadu muda ba 3-2 hodi hametin Santo António nia vitória.
Jogadór sira hetan kartaun kinur
Nagardjo tenta responde atu duni pontu, maibé Santo António taka metin ho block jogu sai manas. Minutu 48, Emmanuel Ghanaian (11) husi Santo António tenke hetan kartaun kinur tanba halo erru hasoru jogadór Nagardjo. Minutu 64, Abril de Deus (8) mós hetan kartaun kinur basá trava avansadu Nagardjo ho emosionál no suta bola la kona no kona fali avansadu Nagardjo nia ain.
Kartaun kinur la’ós ba jogadór Santo António de’it, maibé ba mós Nagardjo basá iha minutu minutu 69 Domingos Ribeiro (2) tenke hetan kartaun kinur tanba kontra regra futeból.
Iha minutu 88, José Pereira (25) hetan tan kartaun kinur tanba kria erru iha jogu laran.
Nune’e apitu ikus nia lian, hatudu jogu termina ona no Santo António nia jogadór kontente no selebra sira-nia vitoria haku’ak sira-nia treinadór Eduardo Pereira.
Jogu ne’e lidera husi árbitru Bernardino Mascarinhas, juiz da liña Gabriel Pereira, Duarte Henrique no árbitru rezerva João Paulo de Jesus.
Ekipa Nagardjo
Vicente Baredes (28); José da Costa (18), Husen Costa (25), Dramicio Morreira (15), Bernardino de Sena (12); Herman Yoku (6), Custodio dos Santos (24); Richi Wally (10), Jorge Alves (7), Avrely Subeu (9), Quenino Marques (17).
Jogadór Suplente Suplente
Valdinho Mouzinho (1), Pedro Belo (19), Domingos Ribeiro (2), Albertinho Ribeiro (14), Rifabiano da Conceição (23), Silvestre Gama (13), Yohan Woppi (8).
Ekipa AD Santo António
Herculano Lopes (12); José Oliveira (6), Sandro Quintão (14), José Pereira (25), Agostinho Araújo (22); Koyo Kanda (16), Abril de Deus (8); Natalisio Pereira (24), Anizio Boavida (26), Ologar Xavier (18), Adelino de Oliveira (3).
Jogadór Suplente
Lourenço Henrique (20), Palomito Ribeiro (5), Zeferinho Monteiro (19), Silveiro Garcia (27), Uaitilia Amaral (17), Braz de Deus (33), Emmanuel Ghanaian (11), Juvencio Casimiro (10), Januario da Silva (23), Octávio Mesquita (13), Herbonio Lopes (31).
Ho vitória “remontada” ne’e, Santo António hetan pontu 3 importante hodi sa’e ba liña primeiru tabela klasifikasaun provizóriu Grupu A ho pontu 9, husi jogu dala-tolu, manán hotu. Tuir kedan FIEL FC ho pontu 7. Nagardjo pozisaun terseiru ho pontu rua husi joga dala-tolu, empata rua no lakon ida, tuir Ponta Leste ho pontu 1 husi joga dala-tolu, lakon rua, empata ida, pozisaun ikus liu mak Vila Ataúro ho pontu zero iha jogu dala tolu lakon hotu.
Rezultadu ne’e lori ona oportunidade di’ak ba Santo António ho FIEL atu hadau malu iha sira-nia jogu ikus sé mak manán sei avansa ba Primeira Divizaun iha tinan oin.
Jornalista: Hortêncio Sanchez
Editora: Maria Auxiliadora
