BOBONARU, 19 Juñu 2026 (TATOLI)-Komunidade iha aldeia Oplegul, suku Holsa, postu administrativu Maliana, munisípiu Bobonaru, solisita ba Governu atu tau prioridade ba reabilitasaun estrada ligasaun husi bairu SMP 2 to’o fronteira suku Tapo-Memo, tanba estrada ne’e seidauk inklui iha projetu reabilitasaun estrada rurál pakote I no II ne’ebé inaugura ona.
Komunidade Feliciano de Jesus Lopes hateten katak estrada ne’e importante tebes tanba liga ba suku Tapo-Memo, ne’ebé lokaliza besik fronteira ho nasaun viziña Indonézia no sai mós área importante ida iha Postu Administrativu Maliana.
Notísia relevante: Abitante aldeia Pipgalak II seidauk asesu Estrada
“Dalan la tahu, maibé ami-nia transporte la’o de’it iha fatuk laran no rai-rahun su’ar loos tanba seidauk tau asphalt. Foin lalais estrada urbana Maliana ne’e la liu husi ida-ne’e, tanba ne’e ami ezije ba Governu halo mós ida-ne’e, tanba Maliana laran estrada di’ak hotu ona, falta ami-nia ne’e”, nia informa.
Feliciano haktuir katak iha tinan sira ba kotuk, parte balun husi estrada ne’e hetan ona reabilitasaun husi projetu nasionál no Programa Nasionál Dezenvolvimentu Suku (PNDS), maibé reparasaun foku de’it ba pontu sira ne’ebé konsidera aat liu.
“Estrada ne’e halo rohan-rohan de’it, balun asphalt, balun uza simentu, barak liu mak rai-mutin, hahú husi SMP 2 mai Lale to’o Memo Leten, más bairu-bairu ne’e sei aat loos”, nia dehan.
Aleinde ne’e, motorista Rofino Amaral mós konfirma katak kondisaun estrada ne’e difikulta movimentasaun no afeta servisu transporta pasajeiru sira.
“Ami lori ema bá Memo karik ne’e di’ak, más kuandu tula sira ida hela iha Memo Leten ne’e, ita la’o susar tanba dalan aat. Pasajeiru selu $2 mós fila ita isin-moras hotu, tanba la’o iha fatuk rahun laran de’it”, nia dehan.
Ba kestaun ne’e, Tatoli halo konfirmasaun ho Koordenadór Infraestrutura MOP munisípiu Bobonaru, Fernando de Fátima, maibé la fó komentriu tanba prosesu hotu iha ona nasionál.
Estrada ne’e liga mós bá suku Saburai, postu administrativu Maliana, no suku Gildapil, suku Guda, postu administrativu Lolotoe, inklui munisípiu Kovalima.
Notísia relevante: Komunidade husu kompleta konstrusaun drenajen no trotoar iha estrada Maliana
Jornalista: Sergio da Cruz
Editora: Maria Auxiliadora
