BOBONARO, 16 jullu 2023 (TATOLI)—Abitante aldeia Pipgalak II, suku Tapo-Memo, postu administrativu Maliana, munisípiu Bobonaro, dezde Timor-Leste restaura independénsia iha 20 maiu 2002 to’o ohin lorona ne’e seidauk asesu estrada.
Xefe suku Tapo-Memu, Joaquim Baptista, hateten situasaun ne’e liu-liu iha tempu udan ne’e fó impaktu ba komunidade lori produtu lokál atu asesu ba merkadu sentrál Maliana Villa.
Notísia Relevante: Komunidade Pipgalak II iha suku Tapo-Memo maioria seidauk simu vasina
“Ha’u-nia aldeia ne’ebé agora daudauk estrada aatliu mak aldeia Pipgalak II ka hanaran Pipgalak Il-Lilis, ne’ebé mak dezde bei’ala iha ne’ebá sentrál ba kultura suku Tapo-Memo,” nia hateten ba jornalista sira iha Maliana, domingo ne’e.
Líder komunitátria ne’e hateten, durante ne’e konsege tau prioridade ba estrada ne’e liuhosi Programa Nasionál Dezembolvimentu Suku (PNDS) regulár, maibé orsamentu la sufisiente atu rezolve hotu kedas.
Aleinde estrada ne’e, Xefe suku ne’e dehan, komunidade mós preokupa kona-ba kondisaun estrada ligasaun hosi Cabang Memo ba sentru suku no Ligasaun Postu Unidade Patrullamentu Fronteira (UPF) ne’ebé establese iha suku ne’e.
Nia dehan, kondisaun estrada refere difikulta movimentu komunidade liu-liu membru UPF sira atu halo vijilansia iha liña fronteira Timor-Leste no Indonézia.
“Iha 2017 kedas ha’u halo karta, momentu ne’e VIII Governu Konstituisionál to’o 2021 mós ha’u sei halo karta no antes eleisaun ne’e mós ha’u halo karta ba orgaun seberanu tolu, liuliu ba Jenerál Taur Matan Ruak, maibé to’o ohin loron rezultadu laiha. Dalan refere ita hare hanesan mota, ne’ebé agora ne’e komunidade labele asesu inklui tranporte públiku no transporte Patrllamentu UPF nian,” nia hateten.
Entretantu, totál populasaun iha suku Tapo-Memo hamutuk 5.463 ho totál xefe família 1.384, nr’ebé mai hosi aldeia neen mak hanesan Pipgalak I, Pipgalak II, Lepgen, Kuluati, Tunubibi no Manu-aman.
Notísia Relevante: Abitante 505 iha Pipgalak II seidauk asesu eletrisidade
Jornalista : Sergio da Cruz
Editór : Cancio Ximenes
