DILI, 21 Juñu 2026 (TATOLI)–Olanda susesu iha nia jornada daruak grupu F bainhira halakon adversáriu Suésia ho rezultadu festa golu 5-1, iha jogu Kopa Mundiál FIFA 2026 ne’ebé hala’o Domingu madrugada, iha Estádiu Houston Estadu Unidu Amérika (EUA).
Vitória ne’e halo Olanda sa’e ba lidera tabela klasifikasaun provizóriu iha Grupu F Kopa Mundiál 2026 nian ho pontu haat husi jogu rua. Suésia tuun ba pozisaun daruak ho pontu tolu.
Bainhira jogu hahú, ekipa rua lansa kedan kontra no atake ba malu tuir tékniku no abilidade ne’ebé iha. Olanda halo kedan presaun maka’as kontra Siésia ho velosidade ne’ebé maka’as.
Iha kontra-atake ne’e, Olanda hetan vantajen antesipadu hafoin de’it minutu lima grasa ba golu husi jogadór Brian Brobbey nian hafoin simu pasajen husi nia kolega Cody Gakpo. Nune’e, muda rezultadu ba 1-0.
Notísia relevante : Japaun silu-tohar Olanda nia mehi empata 2-2 iha Kopa Mundiál 2026
Kontra-atake sai manas liu, Siésia tenke lakon bola barak liuliu iha liña klaran, Olabda halo presaun la para, iha minutu 17 Brobbey konsege sobu tan defeza Suésia nian hodi marka nia golu daruak hafoin konverte pasajen husi nia kolega Denzel Dumfries. 2-0 ba Olanda.
Suésia tenta atu taka lakuna ne’ebé komete iha kampu laran, inklui esforsu maka’as husi jogadór Viktor Gyokeres nian, maibé bola ne’ebé nia lori hetan blokeiu hosi Fuarda-Rede olandés Bart Verbruggen.
Husi atake ne’ebé Suésia halo marka duni golu ida hasoru Olanda, maibé golu referidu hetan dezisti hosi árbitru tanba Gustaf Lagerbielke iha pozisaun offside.
Husi rezultadu ne’ebé iha terima jogu parte dahuluk ho eskoru 2-0. Olanda provizóriu lidera jogu.
Bainhira fila husi intervallu, Olanda hatama fali golu lalais husi jogadór Cody Gakpo bainhira simu pasajen husi Dumfries nian iha minutu 47. Rezultadu nakfilak ba 3-.
Presaun husi Olanda sa’e maka’as fó tan vantajen ba jogadór Gakpo marka tan nia golu daruak iha minutu 54, bainhira simu bola pasa husi Crysencio Summerville iha liña oin Suésia nian. Rezultadu monu ba 4-0
Masme sofre ona golu haat, maibé Suésia la lakon esperansa, jogu ne’e luta koletivu la’ós indivíduu, jogadór sira organiza malu ho di’ak nune’e iha minutu 59 hetan fali esperansa kiik ida hodi hamenus sira-nia sofrimentu.
Jogadór Anthony Elanga konsege hamenus duni golu ida liuhusi pasajen ida husi Alexander Isak. Anthony marka golu muda rezultadu ba 1-4.
Biar nune’e, Olanda la harudu nia frakeza, sira kombina malu nafatin. Bainhira jogu besik atu ramata, Olanda aumenta tan golu ida hosi Summerville iha minutu 89, ne’ebé mak mantein to’o jogu nia rohan. Olanda lidera jogu absolutamente ho vitoria boot 5-1.
Jogadór sira husi Olanda (4-3-3)
Bart Verbruggen; Virgil Van Dijk (kapitaun), Jan Paul Van Hecke, Denzel Dumfires, Micky Van De Ven; Frenkie De Jong (Teun Koopmeiners 59), Ryan Gravenberch, Tijjani Reijnders (Gus Till 59); Donyell Malen (Crysencio Summerville 45), Brian Brobbey (Memphis Depay 72), Cody Gakpo
Jogadór sira husi Suésia (3-1-4-2)
Kristoffer Nordfeldt; Gustaf Lagerbielke, Isak Hien, Victor Lindelof (kapitaun); Jesper Karlstrom Besfort Zeneli 56); Alexander Bernhardsson (Anthony Elanga 55), Yasin Ayari, Benjamin Nygren (Lucas Bergvall 56), Gabriel Gudmundsson; Alexander Isak, Viktor Gyokeres.
Jornalista : Hortêncio Sanchez
Editora : Julia Chatarina
