DILI, 22 Juñu 2026 (TATOLI)—Tubarões Azuis prova fali ba mundu katak sira la’ós ekipa kiik, sira mak ekipa jigante ne’ebé la’ós atu fó respeitu de’it maibé foti dunia sira-nia rai nia naran hodi fó respeitu.
Ekipa Kabu-Verde mak ekipa úniku ne’ebé konsege empata ho España-Kampiaun Europa ho rezulatdu 0-0 no agora empata ho Uruguai-Kampiaun Mundiál Dahuluk iha istória kopa Mundiá ho rezulatdu golu 2-2.
Husi istória ne’ebé Kabu-Verde hakerek. Metin ona no metin tebes ona iha istória futeból, sira hatudu ba mindu katak nasaun kiik la’ós problema maibé esforsu, dixiplina no hakraik an mak sei sai boot husi rezultadu. Sira doko mundu, uluk mundu ladun tau matan ba sira tanba sira Illa kiik ida iha Áfrika, ohin sira nia jogu brillante mundu hahú hateke no hatene sé mak nasaun Cabo Verde.
Iha jogu dahuluk faze grupu H, ekipa Kabu-Verde empata 0-0 kontra España, iha jogu dariuk ohin dadeer iha Estádiu Hard Rock, Miami segunda ne’e empata 2-2 ho Uruguai.
Eskore 2-2 ne’e la’ós de’it pontu ida (1). Ne’e mensajen: Afrika mai atu compete no Kabu-Verde mai atu marka istória.
Jogu Uruguai nian hasoru Kabu-Vedre iha Grupu H Kopa Mundiál 2026 ne’ebé ho intensidade maka’as.
Uza sira-nia farda uma-na’in ho kór azul-kloot, Uruguai domina kedas. Federico Valverde ho nia kolega sira hatene didi’ak sira-nia superioridade hasoru Cabo Verde, nune’e sira joga ho agresivu hahú husi inísiu.
Iha minutu 10 dahuluk, Uruguai halo presaun. Entretantu, kabu-Verde bele de’it halo kontra-atake. Kabu-Vedre nia velosidade halo Uruguai sai laran-taridu.
Iha minutu 20, durante kontra-atake ida, jogadór uruguaiu ida obriga atu hamonu jogadór Cabo Verde ida iha de’it área penalti nia liur. Suta livre ida fó ba Kau-Verde.
Kevin Pina hamriik hasoru bola. Iha de’it jogadór uruguaiu na’in-rua iha parede. Ida-ne’e hanesan hahalok subestimasaun nian, ho serteza, Uruguai hetan kastigu husi kabu-Verde.
Pino nia tiru ne’e loos no maka’as. Ida-ne’e liu ho fasil parede no sa’e ba baliza nia kantu kraik. Fernando Muslera la konsege alkansa bola livre. Rezultadu 1-0 ba Kabu-Verde.
Hafoin atake brillante, Uruguai ikus mai halo empata iha minutu 44. Jogadór Uruguai Maximiliano Araujo hetan vantajen ho kabesa ida, bola tama liu babrede laran Kabu-Verde jogu empata 1-1.
Iha tempu adisionál primeira parte nian, iha minutu 45+6, Uruguai lidera hikas jogu liuhusi jogadór Agustin Canabbio maka marka golu furak ida, hodi kapitaliza ho ulun hosi Maximiliano Araujo. Rezultadu muda ba 2-1. Uruguai lidera jogu primeira parte.
Dolar ba segunda parte, jogu ladún diferensa ho primeira parte, Uruguai halo jogu no Kabu-Verde defende. Iha minutu 10 dahuluk, laiha ekipa ida mak kria oportunidade klaru ou golu.
Jogu la’o ho kontra-atake husi ekipa rua, iha minutu 61, hafoin lansamentu ida-ne’ebé la loos, Kabu-Verde halo empata liuhusi Helio Varela ho nia ain-loos. Rezultadu hatuur ba 2-2.
Liutiha minutu hitu, iha minutu 68, Uruguai halo golu datoluk hafoin luta ida. Maibé, golu ne’e la permite husi árbitru tanba xamada ofside husi jogadór uruguai ida.
To’o minutu 90 husi oras normál, Uraguai seidauk hakat liu baliza Kabu Verde nian. Eskore mantein empata ho 2-2. Ofisiál dahaat fó sinál minutu ualu ba tempu adisionál nian.
Kabu-Verde iha oportunidade di’ak durante períodu ne’e, maibé ida-ne’e hetan frustrasaun tanba hatudu egoísta husi sira-nia jogadór sira. Maske nune’e, Kabu-Verde mantein Uruguai ho empata 2-2.
Husi rezultadu ne’e tabela klasifikasaun provijoriu lidera husi España ho pontu haat, Uruguai pontu rua, Kabu-Verde pontu rua no ikus liu Arábia Saudita laiha pontu no hein jogu kompleta fila ona ba nia nasaun orijen.
Kabu-Verde ho Uruguai sei hadau malu iha sira-nia jogu ikus, bainhira Uruguai manán España nia sei avansa ba jornada 32, maibé lakon la avansa, enkuantu Kabuu-Verde tenke manán Arábia Saudita iha jogu ikus atu nune’e bele avansa ba jornada 32.
Jogadór husu Uruguai
Fernando Muslera (PG); Guillermo Varela, Sebastian Caseres, Mathias Olivera, Juan Manuel Sanabria; Manuel Ugarte, Rodrigo Bentancur; Agustin Canobbio, Federico Valverde, Maxi Araujo; Federico Vinas
Jogadór husi Kabu-Verde
Vozinha (PG); Steven Moreira, Pico, Diney, Sidny Lopes Cabral; Kevin Pina; Telmo Arcanjo, Ryan Isaac, Jamiro Monteiro, Garry Rodrigues; Gilson Tavares.
Jornalista : Hortêncio Sanchez
Editór : Cancio Ximenes
