DILI, 24 Juñu 2026 (TATOLI) – Sekretáriu-Jerál Partidu FRETILIN, Marí Alkatiri, hateten uluk kedas nia parte iha mehi no hakarak líder polítiku sira hamutuk no labele iha konflitu, nune’e dezenvolve país ida-ne’e.
Alkatiri dehan mehi hamutuk ne’e nia apela dezde 2018, ne’ebé signifika katak apelu ba unidade.
“Ha’u hakerek kedas karta ida ba líder prinsipál sira, atu tuur hamutuk halo balansu saida tan mak bele hadi’a, la’ós agora, se tempu ne’ebá ha’u halo tiha ona ida-ne’e, agora ne’e ha’u halo ho kle’an liután. Aproveita iha situasaun susar ida-ne’e buka dalan atu iha entendimentu”, Marí Alkatiri hateten iha Faról, ohin.
Nia esplika kona-ba nia apelu ne’e atu hamutuk filafali ne’e la’ós agora, maibé antes tanba nia iha konxiénsia katak só bele lori fundadór sira-nia mehi no mártir sira-nia mehi ba oin bainhira hamutuk.
Hodi subliña bainhira líder polítiku ka rezisténsia hamutuk, signifika bele kombate ki’ak, konflitu no hamoos matan-been povu nian. Hamutuk filafali foti kauza ida, Kauza ne’e mak atu korre povu husi mukit no ki’ak.
“Ne’e para kauza komún ita hotu serbisu hamutuk. Ami husi 1994-1975 ne’e bele husik buat ruma pozitivu ne’ebé jerasaun foun sira mai banati tuir ka hadi’a. Ha’u bele dehan horikalan ha’u admira tebes Portugál manán 5-0, maibé laiha barullu, parabéns ba timoroan hotu”, nia konklui.
Iha biban ne’e Alkatiri mós hateten katak nia parte seidauk hetan kontaktu ka informasaun husi Primeiru-Ministru Xanana Gusmão kona-ba partisipa iha serimónia fúnebre maktoban antigu Prezidente Repúblika Francisco Guterres “Lú Olo”, maibé nia hateten sei iha tempu ba Xanana atu partisipa.
“Ha’u la hatene. Husi ne’ebá [Portugál] mai la’ós oras rua de’it, maibé ida-ne’e oras 20. Sei iha tempu, ha’u laiha informasaun mai ka la mai, maibé tempu sei iha”, nia hateten.
Notísia relevante: Alkatiri agradese desizaun Estadu haloot Lú Olo entre Francisco Xavier no Ma’huno
Jornalista: Arminda Fonseca
Editora: Maria Auxiliadora
