DILI, 24 Juñu 2026 (TATOLI) – Enkarregadu Negósiu Ad Interinu husi Embaixada Indonézia iha Timor-Leste, Nugroho Aribhimo, despde Prezidente Repúblika, José Ramos-Horta, no hato’o nia sentidu kondolénsia ba falesimentu eis-Prezidente Timor-Leste, Francisco Guterres “Lú Olo”, ne’ebé nia konsidera nu’udar luta-na’in ida ne’ebé konsistente no dedikadu ba povu no nasaun to’o nia iis kotu.
Nugroho hato’o deklarasaun ne’e iha ámbitu despedimentu ne’e tanba nia mandatu sei termina iha loron 01 Jullu 2026, nu’udar Xefe Misaun Indonézia iha Timor-Leste.
“Ita hatene Francisco Guterres Lú Olo nu’udar eis-Prezidente ida, no hanesan mós kombatente ida ba Timor-Leste. Nia konsistente luta ba povu ne’e to’o ninia vida termina iha mundu ne’e. Hanesan Enkarregadu Negósiu Ad Interinu, ha’u hasoru malu ho Prezidente Repúblika José Ramos-Horta hodi despede no hato’o ami-nia sentidu kondolénsia ba eis-Prezidente Francisco Guterres Lú Olo nia mate”, nia dehan ba jornalista sira iha Palásiu Prezidensiál, Bairu Pité, Dili, ohin.
Aleinde hato’o sentidu kondolénsia, Nugroho mós hato’o agradesimentu ba Governu Timor-Leste ba apoiu, koordenasaun, no kooperasaun ne’ebé sira estabelese ona durante knaar tinan rua iha Timor-Leste.
Iha okaziaun hanesan, Nugroho mós husu deskulpa ba erru ruma ka komentáriu la ho intensaun ne’ebé nia halo durante hala’o nia knaar ne’ebé bele ofende parte ruma.
Nia subliña katak molok sai husi Dili, nia sei entrega nia knaar ba Banga Malewa, konselleiru ida iha Embaixada Indonézia nian iha Díli, ne’ebé sei hala’o knaar nu’udar Enkarregadu ba Negósiu Interinu.
Hafoin ne’e, funsionáriu superiór ida ho grau husi Ministru Konselleiru provavelmente sei to’o hodi kontinua nia knaar sira to’o nomeasaun husi Embaixadór foun ida ba Repúblika Indonézia nian.
Tuir Nugroho, Governu Indonézia sei hein hela desizaun kona-ba nomeasaun ba embaixadór foun mai Timor-Leste.
“To’o ohin loron seidauk iha desizaun kona-ba sé maka sai hanesan Embaixadór Indonézia nian iha Timor-Leste. Ami hein nafatin. Dala ida tan, ha’u hakarak agradese ba Governu no povu Timor-Leste nia kooperasaun no tulun durante ha’u-nia mandatu tinan rua iha Dili”, nia hakotu.
Jornalista: Arminda Fonseca
Editora: Maria Auxiliadora
