DILI, 25 Juñu 2026 (TATOLI)–Veteranu Terra Mau Bulak preokupa ho Ministériu Saúde (MS) kona-ba tratamentu saúde veteranu sira-nian, liuliu Saudozu Antigu Prezidente Repúblika, Francisco Guterres ‘Lú Olo’.
Nune’e, husu ba Ministériu Saúde atu fó klarifikasaun públika kona-ba tratamentu saúde ne’ebé simu husi Saudozu Francisco Guterres ”Lú Olo” molok nia hakotu-iis, liuliu kona-ba prosedimentu no akompañamentu saúde iha rai-li’ur.
Tuir Terra Mau Bulak, Lú Olo hanesan ema ida-ne’ebé haraik-an, pasiénsia no onestu, ne’ebé durante luta armada sempre hamutuk ho nia maluk sira iha frente polítika no militár.
”Dezde inísiu ami eskola hamutuk, iha polítika ami hamutuk no iha funu mós ami hamutuk. Nia líder ida-ne’ebé iha kapasidade organiza no komanda durante luta ba independénsia,” Terra Mau Bulak hato’o ba TATOLI, Kinta ne’e.
Terra Mau Bulak mós husu klarifikasaun kona-ba papél instituisaun Estadu nian, inklui autoridade saúde no reprezentasaun diplomátika Timor-Leste iha rai-li’ur, durante prosesu tratamentu no akompañamentu ba Saudozu Lú Olo.
Iha parte seluk, nia rekorda mensajen sira-ne’ebé Lú Olo dalabarak hato’o durante nia moris, liuliu kona-ba nesesidade atu respeita no valoriza veteranu sira-ne’ebé kontribui ba luta libertasaun nasionál.
Tuir nia, Lú Olo mós sempre preokupa ho kondisaun povu ki’ak no vulneravel sira, no husu Estadu atu fó-atensaun boot ba área saúde, edukasaun no asisténsia sosiál.
”Mensajen Lú Olo nian mak Estadu tenke tau-matan ba povu ki’ak no faluk sira, liuliu iha setór saúde, edukasaun no asisténsia sosial,” Terra Mau Bulak tenik.
Nia aumenta katak Governu tenke kontinua valoriza kontribuisaun veteranu sira no asegura katak povu sira-ne’ebé presiza apoiu, liuliu iha área saúde no edukasaun, hetan atendimentu ne’ebé dignu no justu.
Jornalista: Osória Marques
Editór: Xisto Freitas da Piedade
