KOVALIMA, 25 Juñu 2026(TATOLI) – Sekretáriu Estadu Formasaun Profesionál no Empregu (SEFOPE), Kinta-ne’e, disemina papél Sekretáriu Apoia Konsellu Nasionál Traballu no Konsellu Arbitrajen Traballu ba Empregadór no Traballadór sira iha munisípiu Kovalima.
Atividade disemina informasaun atu hasa’e empregadór ho traballadór sira nia koñesementu kona-bá papél Sekretáriu apoiu Konsellu Nasional Traballu no Konsellu Arbitrajen Traballu ba empregadór no traballadór sira,iha munisípiu Kovalima.
Papél Konsellu Nasionál Traballu mak hanesan Konsellu Nasionál Traballu nu’udar órgaun konsultivu Tripartida, kompostu husi reprezentante Governu, reprezentante organizasaun Sindikatu no reprezentante asosiasaun Empregadór sira-nian, tuir dispostu artigu 100. Husi Lei númeru 4/2012, 21 Fevereiru, aprova Lei Traballu, no artigu 1 no artigu 3 husi Dekretu Governu númeru 7/2016, loron-15 fulan-Juñu, kona-bá Konsellu Nasionál Traballu.
Halo promosaun ba diálogu sosiál no konsertasaun entre parseiru sosiál sira, Hasai pareser kona-bá preparasaun ba politika sira no lejislasaun ne’ebé refere ba relasaun Traballu, Halo proposta ba saláriu mínimu nasionál no Funsaun seluk ne’ebé atribui husi lei.
“Ha’u hanoin dala barak traballadór sira la koñesementu kona-bá arbitrajen ho esplikasaun husi aprezentadór traballadór no empregadór sira bele iha koñesementu”, Xefe Sekretáriu Apoiu Konsellu Nasional Traballu no Konsellu Arbitrajen Traballu, Mario de Jesus Salsinha, dehan ba jornalista sira-nia iha salaun Postu Administrativu Suai.
Xefe ne’e dehan, dala barak empregadór sira konsidera lei traballu ne’ebé mak eziste iha Timor-Leste sira bele viola tuir sira-nia hakarak ho disemina informasaun empregadór sira labele halo tuir sira-nia hakarak.
Intensaun husi diseminasaun informasaun ba empregadór ho traballadór sira ne’e oinsá atu hasa’e sira-nia koñesementu nune’e ida-idak hala’o nia dever hanesan empregadór atu viola traballadór direitu karik sira hatene nune’e sira labele viola no traballadór sira hatene sira nia dever.
Reprezentante Diretór SEFOPE Kovalima ,João Pereira reforsa katak,Disemina kona-bá lei sira taba SEFOPE iha diresaun ida mos atu halo hala’o mediasaun hodi buka solusaun ba traballadór entre empregadór sira.
“Ita disemina kona-ba lei iha SEFOPE iha diresaun ida naran Diresaun Arbitrajen baibain ita hala’o prosesu mediasaun iha SEFOPE la iha solusaun kontinua ba lori ba iha diresaun arbitragen nune’e ekipa husi nasionál atu habelar informasaun kona-bá papel Arbitrajen ni’an .Prosesu halo mediasaun partisipa husi empregadór,sindikatu sira atu buka solusaun relasiona konflitu ne’ebé mosu iha ita-boot sira-nia servisu fatin”nia dehan.
Iha fatin hanesan, Reprezentante PAM, Ildefonso Maria Amaral, dehan disemina informasaun kona-bá papel Arbitrajen ne’e importante tebes oinsá traballadór ho empregadór bele komprende lalaok Arbitrajen husi SEFOPE
“Ita sempre rezolve problema barak traballadór sira hasoru sira-nia patraun ,Kada halo sosializasaun maibé ita hasoru mak ita-nia timor oan sira ne’ebé presta servisu loza cina sira husu atu kontinua hatutan informasaun ba imi nia patraun sira bele intende tanba balun intende ona balun seidauk kona-bá mediasaun “nia fó hanoin.
Jornalista:Celestina Teles
Editór:Florencio Miranda Ximenes
