DILI, 26 Juñu 2026 (TATOLI)- Antigu Prezidente Repúblika Francisco Guterres “Lú Olo” nia kadáver to’o ona iha Parlamentu Nasionál hodi fó omenajen ikus.
Tuir observasaun Tatoli, iha vizita ikus ne’e komunidade no estudante sira hamriik iha estrada prinsipál sira hodi halo orasaun no kanta molok maktoban to’o iha uma fukun.
Iha portaun xegada nian, firme kedas husi korpu seguransa FALINTIL-Forsa Defeza Timor-Leste (F-FDTL) ne’ebé kaer bandeira FALINTIL no RDTL. No iha resintu Parlamentu Nasionál nian família hamriik forma to’o odamatan boot tama ba Parlamentu Nasionál nian.
Bainhira maktoban ho karru funeráriu to’o ba, komunidade hamriik iha portaun xegada nian simu kedas ho so’e ai-funan iha karru funeráriu.
Bainhira kaixaun to’o, simu kedas husi membru F-FDTL no Polísia Nasionál Timor-Leste (PNTL) na’in-sanulu ne’ebé prepara simu kaixaun no lori bá iha sala plenária.
Bainhira hakat ba sala plenária, espoza maktoban Cidália Mouzinho ho oan ki’ak na’in-haat no família la’o iha kaixaun nia oin hodi hakat bá plenária.
Nune’e, deputadu sira inklui Prezidente Parlamentu Nasionál prontu ona iha sala plenária hodi hein no simu maktoban.
Bainhira kadáver to’o populasasaun balun hakilar viva Lu Olo hodi hatudu katak isin laiha ona maibé espíritu sei moris. Aleinde ne’e, komunidade sira ne’ebé hein iha portaun ne’e simu ho matan-been.
Jornalista: Arminda Fonseca
Editora: Maria Auxiliadora
