OEKUSI, 02 Jullu 2026 (TATOLI) – Diresaun Serbisu Rejionál Transporte Terrestre no Komunikasaun (DRTTC, sigla Portugés) iha Rejiaun Administrativa Espesiál Oekusi Ambeno (RAEOA), sei submete motorizada hamutuk 91 ba leilaun públiku, tanba kleur ona atraka no abandonadu iha edifísiu oin to’o balun hahú ferujén ona.
Diretór Diresaun Serbisu Rejionál Transporte Terrestre no Komunikasaun Oekusi, Domingos de Almeida, hateten, motorizada hirak ne’e eziste iha arredór edifísiu DRTTC kuaze tinan rua ona dezde Setembru 2024 atu hetan dokumentu legalidade husi DRTTC no Autoridade Aduáneiru (AA) Alfándega, maibé to’o ohin loron, motorizada na’in seidauk koopera hodi trata dokumentu sira.
“Motorizada hirak-ne’e, sira-nia na’in maka lakohi koopera, entaun lei fó dalan atu ita halo fali ba leilaun públiku, la’ós nia na’in mai maki ta la atende, maibé durante ne’e ita hein hela, signifika sira lakoi ona entaun Governu iha obrigasaun atu deside motorizada sira-ne’e,” nia hateten ba jornalista sira iha Oekusi, ohin.
Notísia relevante:Motorizada ilegál 1.919 iha Oé-Cusse hahú rejista atu hetan dokumentu
Domingos de Almeida, informa, parte DRTTC seidauk define data loloos bainhira mak halo leilaun, “Ami seidauk deklara sai kona-ba nia data fiksu bainhira mak fó sai avizu, husi parte transporte mós ami hein tempu kle’ur ona, tanba balun sei buka osan, tanba selu ne’e atu hasai motorizada sira-ne’e dalarua, ba DRTT selu $64,00 no Alfándega mós $30,50, entaun kuandu na’in lakohi mai foti ona ami sei anúnsia atu halo leliaun,” nia informa.
Maibé, nia dehan, molok halo leilaun públiku, parte Diresaun Serbisu Rejionál Transporte Terrestre no Komunikasaun sei koordena ho Diresaun Patrimóniu Estadu no Prezidente Autoridade RAEOA hodi hetan despaixu ofisiál ida nu’udar desizaun Governu nian.
“Ita sei fó koñesimentu ba instituisaun relevante sira depois mak ita sei haree, maibé posibilidade tama kategória leilaun públiku, mas la’ós ami mesak, sei liga ho Diresaun Patrimóniu Estadu no mós sei hetan despaixu husi Prezidente Autoridade ou bele mós halo ho deliberasaun ida, depois maka anúnsia ba leilaun públiku,” nia hateten.
Notísia relevante:Atensaun! ‘Liman-naruk’ hahú ona iha Oekusi, PNTL rejista kazu primeiru motorizada lakon
Jornalista: Abílio Elo Nini
Editór: Rafael Ximenes de A. Belo
