DILI, 03 Jullu 2026 (TATOLI) – Partidu Kmanek Haburas Unidade Nasionál Timoroan (KHUNTO) komemora nia aniversáriu ba da-15 iha 04 Jullu (2011-2026). Nune’e, Xefe Bankada KHUNTO, Antónia Verdial, apela ba kuadru no militante sira atu matein pás no kontribui ba dezenvolvimentu país.
Iha okazisaun ne’e, Xefe Bankada parabeniza ezisténsia partidu nian no husu estrutura husi nivel nasionál, munisipál, postu administrativu, to’o suku tenke esforsu halo serbisu hodi hola parte iha prosesu tomak iha prosesu konstrusaun país.
“Husu ba militante no simpatizante KHUNTO nia oan iha territóriu atu ajuda liután Governu, ho meiu kria estabilidade, fó oportunidade ba Governu hodi halo dezenvolvimentu iha nivel hothotu. Pás, trankuilidade no domin tenke iha hodi hatán ba baze identidade partidu nian hanaran katak fé, esperansa no karidade, moris di’ak no justisa”, nia hato’o iha Parlamentu Nasionál, ohin.
Deputadu ne’e afirma katak ezisténsia partidu metin ona mezmu foin tinan 15, tanba partisipa ona eleisaun sira no hola parte mós iha governasaun liubá. Daudaun KHUNTO sai nu’udar opozisaun no kontinua partisipa ativa hodi halo fiskalizasaun, fó hanoin konstrutiva sira ba Governu atu mellora erbisu sira ba moris di’ak povu nian.
“Kualidade serbisu ne’ebé partidu hala’o presiza efetivu liután, fó liman no neon ba malu hodi bele hetan domin, pás no justisa iha ita-nia rai”, nia dehan.
Notísia relevante: KHUNTO kestiona konstrusaun Uma Dignu ne’ebé la’o tarde
Jornalista: Nelson de Sousa
Editora: Maria Auxiliadora
