LIKISÁ, 03 Jullu 2026 (TATOLI)—Governu liuhusi Sekretáriu Estadu Komunikasaun Sosial (SEKOMS) halo lansamentu ba plataforma suku dijitál no jornál parede dijitál iha Suku Maumeta no Suku Lauhata, Postu Administrativu Bazartete, Munisipiu Likisá.
Programa suku dijitál ida-ne’e kontribui ba desenvolvimentu nasionál hodi establese wibsite ba suku nomós eskola sira hodi fó sai informasaun sira-ne’ebé mak iha.
Sekretariu Estadu Komunikasaun Sosial, Expedito Dias Ximenes, hateten SEKOMS lori Governu Konstitusionál da-sia (IX) nia naran ohin mai lansa sentru informasaun suku dijital ba iha Suku Maumeta no Suku Lauhata nomós halo lansamentu ba jornál parede ba eskola tolu iha Munisípiu Likisá.
“Ida-ne’e polítika nonu Governu nian atu bele suku sira 2026 to’o 2028. Ami nafatin kria suku dijitál ne’e iha territóriu laran tomak, nune’e suku sira nafatin atualiza avansu tenkolojia no fahe informasaun ne’ebé mak la’o iha mundu ida-ne’e. Tanba, ohin, ita lansa iha suku rua ne’e hahú ohin ba oin xefe suku sira bele fó sai sira-nia polítika, programa ba iha komunidade, la presiza la’o ba iha komunidade nia leet maibé sira bele liuhusi internet ne’ebé mak iha. Sira bele fó sai ona informasaun ba komunidade liuhusi website ne’ebé mak iha,” Expedito dehan.
Nia afirma, tinan oin suku 24 iha Likisá sei hetan hotu tanba kestaun ba finanseiru ne’ebé mak iha sei fó atensaun ba suku sira seluk iha Timor laran tomak
”Durante ne’e SEKOMS lansa ona suku dijitál iha Dili hamutuk hitu (7), depois ba sira seluk hanesan Lautein no Baukau nomós iha jornál parede dijitál ne’ebé halo mós iha eskola públiku no katóliku. Purtantu, ida-ne’e ho objetivu avansa teknolojia no era informasaun ida-ne’e povu bele hatene prosesu dezenvolvimentu iha nia suku no postu administrativu,” nia afirma.
Tanba ne’e, nia rekomenda ba joven sira ho avansa teknolojia ida-ne’e iha plataforma oioin hanesan facebook, whatsap no seluk tan uza módia sosiál ho étika moral, nune’e kria ambiente saudavel iha sosiedade.
Iha fatin hanesan, Reprezentante Administradór Munisipiu Likisá, Zito António, hateten ohin SEKOMS halo lansamentu website nu’udar sentru ida ba informasaun ba Suku Maumeta no Suku Lauhata hatudu mai katak avansu ona.
”iha 2024, atu informa katak ami halo kompetisaun suku ne’e mak primeiru lugar iha Likisá. Tanba ne’e, ami agradese ba SEKOMS ne’ebe apoiu ami liuhusi website ida-ne’e maibe la’ós ami de’it maibé apoiu mós suku sira seluk,'” Zito esplika.
Ba eskola sira mós hanesan, lansamentu ida-ne’e importante ba aprendizajen bele utiliza mós mídia komunikasaun hanesan mós referénsia ba labarik sira bele estuda ho di’ak.
Diretór Eskola ESTV Likisá Vila, Paulo Edemundo da Silva, hato’o agradesimentu ba Governu liuhusi SEKOMS ne’ebé fasilita ona eskola liuhusi implementasaun jornál parede iha eskola.
“Tanba ne’e mak meiu ida-ne’ebé mak hafasil hodi hasai informasaun sira-ne’ebé mak atividade eskola sira iha, nune’e mós hafasil ami fó sai estudante sira-nia esperiénsia skill ne’ebé mak sira hetan liuhusi jornál parede,” Paulo esplika.
Xefe Suku Maumeta, Victor da Costa, hato’o agradesimentu ba Governu liuhsui SEKOMS ne’ebé halo ona lansamentu ba website, nune’e fó sai informasaun kredivel ba públiku.
Tanba ne’e, ha’u husu ba Governu liuhusi SEKOMS atu kontinua lansa plataforma ne’e ba suku sira seluk, nune’e sira mós bele fó sai sira-nia polítika suku nian ba komunidade,” Victor dehan.
Jornalista : Felicidade Ximenes
Editór : Cancio Ximenes
