KOVALIMA, 09 Jullu 2026 (TATOLI) – Governu liuhosi Ministru Transporte no Komunikasaun (MTK), Miguel Manetelu inaugural postu Unidade Polísia Fronteira ne’ebé konstrui iha Aeroportu Internasionál Komandante Em Chefe Kay Rala Xanana Gusmão, Munisípiu Kovalima.
“Ita mai iha momentu atu inaugura postu (UPF) ida-ne’e nune’e rai ida-ne’e ba oin maske bele troka Governasaun maibé Polísia Nasionál Timor-Leste mantein no hatudu profesionalizmu hodi fó seguransa,” Governante ne’e hateten iha ninia diskursu iha Kovalima.
Nia dehan destakamentu membru UPF iha fatin ne’ebá importante atu kontribui ba seguransa iha areadores aeroportu iha futuru, nune’e governu sei esforsu atu hadia kondisaun liuliu ekipamentu servisu sira.
“Buat uitoan ne’ebé mak ANATL,I.P halo ho apoiu husi ACTL ho nune’e membru Governu hato’o agradese ba ANATL bele halo inaugura ona maske iha buat balun seidauk kompletu ita buka uza hodi atinje rezultadu. Ita-nia kooperasaun parte Aeroporto nian importante tanba durante ne’e alegasaun lubuk ida ne’ebé mak dirije ba governu da-sia,”nia esplika
Iha fatin hanesan Komandante UPF Superintendente Xefe Polísia, Calisto Gonzaga, agradese ba Governu da-sia ne’ebé tau importania ba servisu Unidade Polísia Fronteira.
“Ha’u mós hato’o agradese tanba iha ne’e hakerek katak ha’u-nia sakrifísiu mak dedika ba Estadu ami tenke fó ami-nia aan,tempu hodi husik ami-nia família la’ós tanba ami aan maibé atu oferese ba povu,”nia hateten.
Entertantu, projetu Postu UPF ne’e konstrui ho orsamentu jerál Estadu 2025 ho valór $81.821, ne’ebé maka implementa hosi Kompañia Jeles Bracis Unipessoál Lda, hahú iha loron 21 fulan-Jullu no remata iha Novembru 2025 no inaugural iha loron 9 fulan-jullu 2026.
Serimónia ne’e partisipa husi Sekretáriu Estadu Protesaun Sivíl, ,Komandante Jerál Polisia Nasionál Timor-Leste (PNTL) Komiàriu Asistente Polísia, Afonso dos Santos hamutuk ho Prezidente Autoridade Munisípiu Kovalima no seluk tan.
Jornalista:Celestina Teles
Editór:Florencio Miranda Ximenes
