DILI, 13 Jullu 2026 (TATOLI)-Prezidente Parlamentu Nasionál (PPN), Maria Fernanda Lay, hasoru malu ho Prezidente Repúblika, José Ramos-Horta, hodi rona nia orientasaun no opiniaun kona-ba situasaun polítika iha Giné-Bisau.
Prezidente Parlamentu hateten katak enkontru ne’e hala’o tuir prátika konstitusionál, iha ne’ebé Parlamentu tenke hato’o asuntu importante sira ba Xefe Estadu.
“Delegasaun Parlamentu Nasionál nian sei dezloka bá Angola iha 20 Jullu tinan ne’e. Ho situasaun Giné-Bisau nia, ha’u tenke husu Prezidente Repúblika keta iha orientasaun ruma, tanba ita hatene sira-nia problema komplikadu ne’ebé ami mós sei kuidadu”, Maria Fernanda Lay hateten.
Nia salienta katak ho situasaun iha Giné-Bisau, Fernanda Lay espera katak problema hanesan labele akontese iha Timor-Leste.
Giné-Bisau daudaun enfrenta kontrolu militár nian dezde tentativa golpe Estadu iha Novembru 2025, ne’ebé afeta prosesu divulgasaun rezultadu eleitorál nian.
“Timor-Leste kontinua iha pás atu iha dezenvolvimentu ba ita-nia populasaun. Bainhira ita bá li’ur, ita kompara Timor-Leste depoizde tinan 24 independénsia, ita-nia situasaun sei di’ak liu país sira seluk iha kontestu demokrasia”, nia dehan.
PPN mós hato’o katak Prezidente Repúblika fó orientasaun atu Timor-Leste labele halo komentáriu demains kona-ba asuntu Giné-Bisau, tanba ne’e soberania país nian no asuntu uma-laran país ne’e nian.
“Ita preokupa tanba Prezidente Parlamentu Nasionál [Giné-Bisau] tama kadeia, maibé ita espera katak kontestu iha ha’u-nia intervensaun ita bele husu para sira promove diálogu entre sira. Ida-ne’e sira-nia uma-laran, ita labele tama to’o ne’ebá, respeita ema-nia soberania país”, nia konklui.
Notísia relevante: Angola husu komunidade internasionál labele permite Governu Militár iha Giné-Bisau
Jornalista: Arminda Fonseca
Editora: Maria Auxiliadora
