DILI, 14 Jullu 2026 (TATOLI)-Prezidente Parlamentu Nasionál, Maria Fernanda Lay, husu ba Komisaun Espesializada Permanente sira atu tau atensaun ba lista prezensa durante hala’o fiskalizasaun iha baze, tanba deputadu balun simu tiha per diem maibé la bá terrenu.
“Dala-ida tan agradese ba konsiderasaun Prezidente [Komisaun F] anexa lista prezensa durante fiskalizasaun hodi garante partisipasaun. Tanba deputadu balun simu per diem la bá terrenu”, nia hateten iha reuniaun plenária Parlamentu, ohin.
Iha plenária ne’e l, Komisaun F ne’ebé Trata Asuntu Saúde, Seguransa Sosiál no Igualdade Jéneru, hato’o ninia relatóriu fiskalizasaun ne’ebé foin lalais hala’o iha munisípiu Lautein.
Prezidente Komisaun F, Maria Gorumali Barreto, dehan bazeia ba relatóriu fiskalizasaun ne’ebé hato’o ba Prezidente Parlamentu fó kedas observasaun katak kada fiskalizasaun tenke tau lista prezensa ba deputadu sira ne’ebé partisipa iha atividade ne’e.
“Tanba ne’e mak iha aneksa, tau tuir prezente deputadu sira ne’ebé bá. Ami tenke dehan bá no ida ne’ebé la bá ami tau dehan la bá, depois justifikasaun internál orsida iha komisaun”, dehan.
Atividade fiskalizasaun ne’e ho objetivu atu implementa planu asaun anuál no ezekusaun orsamentu tinan fiskál ne’e, aleinde observa direta kondisaun serbisu entidade governamentál sira ne’ebé tutela iha área kompeténsia komisaun nian.
Parlamentu Nasionál mak órgaun soberania Repúblika Timór-Leste nian ne’ebé reprezenta ema timoroan tomak, iha kbiit atu halo lei, fiskaliza no halo desizaun polítika tuir Konstituisaun iha artigu 92.
Nune’e mós iha artigu 95 Konstituisaun kona-ba Kompeténsia Parlamentu, atu halo fiskalizasaun kona-ba oinsá Governu ezekuta Orsamentu Jerál Estadu (OJE).
Jornalista: Nelson de Sousa
Editora: Maria Auxiliadora
