VIKEKE, 14 Jullu 2026 (TATOLI)—Autoridade Munisípiu Vikeke hamutuk ho ekipa Ministériu Obra Públika (MOP) lansa estrada rurál husi Aldeia Iraler liga ba Daralari, Suku Matahoi, Postu Administrativu Uatulari, Munisípiu Vikeke.
Iha lansamentu ne’e, Reprezentante Prezidente Autoridade Munisípiu Vikeke, Francisco S. Varela, hateten obra reabilitasaun estrada rurál atu fasilita komunidade sira-nia movimentu asesu bá postu no merkadu sira.
“Governu sempre tau importánsia ba nia povu ne’ebé hela iha área rurál, entaun ba lansamentu estrada ida-ne’e hakarak husu ba inan-aman no joven sira tenke hamutuk hodi kontribui ba dezenvolvimentu. Durante ne’e infraestrutura estrada mai área rurál sai dezafiu ba ita hotu. Daudaun ne’e obra tama ona iha ita-nia área ita tenke koopera ho implementadór sira,” Francisco ba joranlista sira iha Aldeia Iraler, Tersa ne’e.
Iha fatin hanesan, Reprezentante Diretór MOP Nasionál, Rogério Freitas, apresia ho komunidade Iraler ne’ebé entusiáz tebes ba implementasaun projetu reabilitasaun estrada rurál kapote I husi Iraler bá área Daralari, nune’e husu komunidade nafatin fó kontribuisaun ba servisu reabilitasaun estrada ida-ne’e.
Aleinde ne’e, Reprezentante Diretór Empreza Ema Horácio Unipessoal, Lda, Abrão Ciquito Menezes, hateten lansamentu estrada ida-ne’e empreza sei la dada tan tempu ba reabilitasaun estrada, más empreza komesa ona mobiliza ekipamantu sira atu hahú servisu.
Nia esplika, estrada husi Iraler liga bá Daralari totál kilómetru 9, estrada rurál modelu betaun. Atu garante kualidade, téknika husi MOP mak sei halo superviziona no Ajénsia Dezenvolvimentu Nasionál (ADN) mak sei kontrola kualidade.
Estrada referida sei benefísia populasaun Suku Matahoi totál hamutuk 4.492 kompostu husi aldeia 12 hanesan Aldeia Aele, Buca Dalan-Matahoi, Loco Loco no Iraler no estrada ne’e fasilita populasaun seluk ne’ebé vizita ba foho matebian.
Reabilitasaun estrada rurál pakote ida hahú husi Iraler to’o Daralari sta 2+500-5+500, númeru kontratu KP/EO/MOP/25078, kustu ba reabilitasaun hamutuk 542.631,88, ne’ebé responsabiliza husi empreza Empreza Ema Horácio Unipessoal, Lda, durasaun tinan ida no retensaun tinan ida.
Entretantu, partisipa iha serimónia lansamentu ne’e kompostu husi autoridade lokál, veteranu, tékniku MOP munisípiu no nasionál, Autoridade Polísia Eskuadra Uatulari, estudante no komunidade Suku Matahoi
Jornalista: Vitorino Lopes da Costa
Editór: Xisto Freitas da Piedade
