DÍLI, 15 Jullu 2026 (TATOLI) – Resistência Nacional dos Estudantes Timor-Leste (RENETIL-Sigla Portugés) sei realiza Kongresu RENETIL IX 2026 durante loron rua, hahu husi 18 to’o 19 Jullu, iha Salaun Casimiro, Universidade da Paz (UNPAZ), Surikamas, Dili.
Kongresu ne’e sei reúne membru RENETIL husi munisípiu hotu-hotu atu halo avaliasaun ba trajetória organizasaun, hametin unidade interna no hala’o eleisaun ba lideransa foun tuir Estatutu no Regulamentu RENETIL.
Prezidente Konsellu Konsultivu RENETIL (CCR-Sigla Portugés) no Vise Prezidente Komisaun Organizadora Kongresu IX, Jose Antonio de Jesus Neves “Samalarua” hateten katak tema Kongresu tinan ida-ne’e mak “Hametin Konsénsia Krítika ba Konstrusaun Estadu no Transformasaun Nasionál.”
“Liuhosi tema ida-ne’e, Kongresu ne’e sei sai hanesan espasu ba reflexaun kona-ba papel istóriku RENETIL, kontribuisaun membru sira nian ba konstrusaun Estadu no formulasaun orientasaun estratéjika atu responde ba dezafiu no oportunidade sira ba futuru Timor-Leste,” dehan Samalarua ba jornalista sira iha edifísiu RENETIL, Farol, Dili, iha Kuarta ne’e.
To’o agora, RENETIL rejista ona membru ativu hamutuk 262 hodi partisipa iha Kongresu ne’e.
Tuir Samalarua, númeru ida-ne’e hatudu komprimísiu boot hosi membru sira husi munisípiu oioin atu kontribui ba hametin estrutura organizasaun.
Durante Kongresu, Komisaun Organizadora mós sei organiza Talk Show/Podcast ne’ebé sei envolve fundadór, antigu kuadru no kuadru atual RENETIL atu fahe esperiénsia, reflexaun no vizaun kona-ba trajetória organizasaun husi tempu rezisténsia, situasaun atuál no orientasaun ba futuru.
Komisaun Organizadora konvida órgaun komunikasaun sosiál, membru RENETIL, parseiru no públiku atu akompaña Kongresu RENETIL IX 2026, no agradese ba ema hotu ne’ebé fó apoiu no kooperasaun ba preparasaun eventu ida-ne’e.
TATOLI
