DILI, 16 Jullu 2026 (TATOLI)-Komisaun E ne’ebé trata Asuntu Infraestrutura iha Parlamentu Nasionál identifika katak konstrusaun uma dignu iha munisípiu Manatutu no Bobonaru la’o tarde no balun abandona.
Prezidente Komisaun E, Marcos Xavier, dehan iha Manatutu konstrui uma unidade 25 ho ninia lokazasaun la hanesan no distánsia dook malu, maibé iha empreza ida de’it mak halo projetu ne’e.
“Ha’u hanoin tenke iha mudansa, labele kompañia ida de’it. Se uma 25 iha kompañia tolu ka haat bele aselera obra ne’e. Se la’e hanesan iha Manatutu uma 25, maibé foin halo haat ne’e, tinan lima mai, mandatu hotu mós [konstrusaun] la hotu”, nia hateten iha Parlamentu, ohin.
Aleinde ne’e, progresu konstrusaun uma dignu unidade 25 iha Tunubibi-Maliana foin atinje 38%-resin, maibé obra ne’e la’o besik tinan tolu.
Komisaun identifika katak kompañia ne’ebé ka’er obra laiha responsabilidade, laiha finanseiru no ekipamentu atu halo projetu ne’e.
“Kabe ba donu projetu ministériu mak tenki haree, xama atensaun no sansaun kuandu beibeik fó ba kompañia seluk ne’ebé iha rekursu atu aselera projetu ne’e. Tanba iha fatin hotu uma dignu ne’e paradu”, dehan.
Deputadu ne’e mós husu ba Komisaun Anti-Korrupsaun (KAK), Provedoria Direitu Umanu no Justisa (PDHJ, silga portugés) atu tau atensaun mós ba kestaun ne’e tanba gasta osan Estadu.
Komisaun rekomenda ba ministériu tutela atu haree mekanizmu foun hodi buka solusaun, nune’e konstrui uma dignu ba populasaun ho durasaun tinan ida tenke ramata tuir tempu, la’ós halo to’o tinan rua no tolu seidauk hotu.
Komisaun mós sei rekomenda ba ministériu tutela atu iha tinan 2027 haree ba preokupasaun hirak ne’e no lalika aloka tan orsamentu ba programa ne’e hodi haree fali atividade seluk.
Notísia relevante: Vise PM Assanami husu kompañia responsável projetu Uma Dignu muda disiplina serbisu
Jornalista:Nelson de Sousa
Editora: Maria Auxiliadora
