DILI, 23 janeiru 2020 (TATOLI)- Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, preokupa ho servisu Tribunál Distritál Dili (TDD) tanba bele hola desizaun fó livre ba autór sira ne’ebé envolve iha kazu taa kanek membru F-FDTL no PNTL.
Notísia Relevante : Grupu ho Atributu Arte Marsiál Taa Membru PNTL
Jenerál Lere dehan, tuir loos ema kriminozu sira ne’ebé taa no baku forsa Estadu nian tenke prosesa tuir lei no fó pena kastigu ne’ebé justu tuir lei.
“Tribunál tenke neutru, se selae, ita maka kria problema ba malu. Ita haree joven sira taa ita nia polisia ida iha Ai-Mutin, ita haree atu husik ka kastigu?. Ami hein!. Labele akontese hanesan uluk elementu F-FDTL ida, ema taa nia liman kotu iha Kuluhun, ema kriminozu ne’e ba detein oras 72 sira husik tiha,” hateten Lere ne’ebé akompaña husi Komandante Jerál PNTL, Komisáriu Faustino da Costa, bainhira hala’o konferénsia imprensa, ohin, iha Kuartél Jenerál F-FDTL, Fatuhada, Dili.
Jenerál Lere la permite bainhira kualkér joven ida taa no baku forsa maka ba tribunál husik ema ne’e livre. Nia fó orden ba forsa sira ba kaer hodi lori ba tribunál no sei husu razaun saida mak tribunál tenke husi ema kriminozu livre.
“Agora mós ha’u hein, se ema sira ne’ebé tama tribunál husik, ami sei kaer fila fali, lori ba tribunál,” dehan Lere.
Iha oportunidade ne’e, Jenerál F-FDTL apela ba grupu krime organizadu sira ne’ebé kontinua tenta perturba lei no orden liuhusi grupu arte marsiál, krime tráfiku droga, tráfiku umanu no krime kontra bandu ho modu saida de’it tenke kuidadu, tanba F-FDTL no PNTL sei la tolera aktu hirak ne’e atu akontese.
Notísia Relevante : Ministru Defeza Deteta Ona Autór Taa Horta
Forsa rua ne’e apela ba grupu hotu- hotu tenke koopera ho forsa mantein estabilidade no dame, atu nune’e, kontinua kaer metin soberanu nasionál fó valór ba sakrifísiu luta eroi sira ne’ebé mate ba rai ne’e.
“Karik ema ruma ne’ebé liu husi grupu krime organizadu ka GAM mak tenta sobu unidade nasionál hodi hatún dignidade país no lider nasionál liu-liu eroi sira nian hodi halakon soberanu nasaun ida ne’e, ami sei la hakru’uk no hatún ami nia kilat bainhira ema ka grupu hakarak sobu nasaun. Apela mós ba ajente estadu ka governu hodi serbí estadu loloos ho neutralidade no responsabilidade. Ami hatene se maka iha situasaun hirak ne’e nia kotuk, se maka fasilita, atu halakon situasaun sira ne’e ami sei foti medida hotu- hotu buka halo reflesaun pasifika hato’o aspirasaun saida de’it kana-ba, imi nia hakarak,” nia afirma.
Iha fatin hanesan, Komandante Jerál PNTL, Komisáriu Faustino da Costa, informa, F-FDTL daudauk ne’e koloka ona ninia forsa unidade hotu- hotu hodi halo patrullamentu iha tempu kalan no loron hodi buka tuir autór kriminozu sira ne’ebé halo krime sei kaer no prosesa tuir lei.
Komandante Unidade Polisia Militár (PM) FALINTIL-Forsa Defeza Timor-Leste (F-FDTL), Majór Abel da Costa Xavier “Niki” ba tinan 2020 kria rasik ninia regulamentu interna, bainhira sivíl baku militár ka polisia sira sei halo asaun kaptura direita no la presiza hein karta mandadu kapturasaun.
“Iha tinan hirak liubá bainhira akontese kazu ema sivíl baku membru FFDTL ami informa ba ami nia komandu atu kaer suspeitu tenke hein mandadu kapturasaun, maibé iha 2020 ami sei la haree ba lei, maibé ami haree ba krime ne’ebé mosu ami sei buka suspeitu subar too rai kuak iha ne’ebé de’it ami sei tenke kaer, se buka suspeitu la hetan kaer inan ho aman lori ba kastigu, ida ne’e mak ami sei halo,” dehan Niki.
Majór Niki hatutan, F-FDTL no PNTL maka liman kro’at nasaun, tenke halo servisu hotu- hotu para garante seguransa hodi labele fó oportunidade ba ema kriminozu atu kria problema no konflitu iha Timor-Leste.
Jornalista : Eugénio Pereira
Editór : Francisco Simões
