DILI, 22 agostu 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa hahú hosi 26 to’o 30 agostu ne’e Autoridade Munisípiu Dili (AMD) sei selebra aniversáriu loron konsulta populár ba dala-XXIII ho atividade konsertu múzika kulturál no feira iha jardin 05 Maiu, Colmera, Dili.
Notísia Relevante: Governu aloka rihun $100 komemora loron Konsulta Populár ba dala-XXIII
Iha atividade ne’e, komisaun organizadora liuhosi Ministériu Administrasaun Estatál (MAE) deside tema selebrasaun “Ho espiritu konsulta populár 30 agostu 1999, mai ita hametin pás no estabilidade ba dezenvolvimentu iha ita-nia rai Timor-Lete”.
“Tuir despaixu, Komisaun Organizadora ba eventu Nasionál hosi MAE hato’o mai Autoridade Munisípiu Dili nu’udar koordenadór, ne’ebé ami estabelese iha seksaun rua mak seksaun animasaun kulturál no feira,” Diretór Servisu Munisipál Jestaun Merkadu no Turizmu, Arthur Henriques, informa ba Agência Tatoli, iha nia kna’ar fatin, Dili, segunda ne’e.
Atividade feira ne’e, Autoridade Munisípiu Dili mak toma konta no animasaun kulturál ka konsertu muzikál sei organiza hosi Diretór Jerál Arquivu Nasionál maibé to’o ikus responsável ne’e fó fiar tomak ba AMD atu tau matan.
“Tanba iha feira ne’e responsável ba seksaun ne’e mak ha’u maibé ho koordenasaun Diretór Jerál Arquivu Nasionál entrega mai ha’u atu bele responsabiliza hotu atividade rua, hanesan animasaun kulturál ka konsertu muzikál no feira. Entaun, iha eventu ne’e ami preparadu ona ba ema sira-ne’ebé atu partisipa, dahuluk ba grupu muzikál, grupu kultura tradisionál, grupu múzika moderna, grupu moredór sira no jerente ne’ebé atu estabelese palku muzikál no ekipamentu muzikál, ida-ne’e preparadu hotu ona,” nia esplika.
Aleinde ne’e, atividade exposizasaun feira ne’e ba dahuluk halo promosaun ba produtu lokál, arte zenatu no promosaun ba arte muzikál ne’ebé sei aprezenta sira-nia talentu múzika durante loron lima (5) nia laran.
Maske nune’e, iha atividade sira-ne’e, Autoridade Munisípiu Dili halo ona kontratu ba partisipante sira hodi anima liu-liu atu harii tenda ba animasaun konsertu no feira.
Ba konsertu múzika, AMD kontratu grupu hamutuk 16 ne’ebé kompostu hosi grupu eroi ba múzika kultura tradisionál, múzika modernu no múzika ida kona-ba konsulta populár, grupu koremetan no hosi grupu 16 ne’e sei halo animasaun troka malu, hanesan loron ida grupu rua (2), tolu (3) ka haat (4) to’o 30 agostu.
Atividade animasaun kulturál ka konsertu muzikál ne’e partisipante sira sei mai hosi suku sira iha Dili laran.
Ba atividade expozisaun feira sei iha promosaun produtu lokál hanesan kafe, soru tais, balun faan karteira, korente, pasta no atividade seluk.
Nune’e, iha selebrasaun loron konsulta populár iha 30 agostu ne’e, AMD sei monta baraka kuaze 20-resin ba komunidade no sira-ne’ebé iha baraka sei monta rasik.
Entretantu, iha atividade selebrasaun loron konsulta populár 30 agostu 2022 ba dala-XXIII ne’e AMD aloka orsamentu hamutuk $13.800.
Notísia Relevante: Rezultadu konsulta populár deside povu nia hakarak ba ukun rasik an
Jornalista : Nelia Fernandes
Editór : Cancio Ximenes
