DÍLI, 14 Jullu 2026 (TATOLI) – Diretór Ezekutivu, Asosiasaun Defisiénsia Timor-Leste (ADTL), Cesário da Silva, husu ba Komisaun Funsaun Públika (KFP) atu estabelese kuota espesífiku ba Ema ho Defisiénsia (EhD) iha prosesu rekrutamentu Administrasaun Públika, atu garante inkluzaun no oportunidade hanesan ba ema hotu hodi kontribui ba dezenvolvimentu nasionál.
“ADTL rekomenda ba KFP atu fó kuota espesífiku ba EhD iha prosesu rekrutamentu Administrasaun Públika ho objetivu atu asegura inkluzaun no oportunidade hanesan ba sidadaun hotu atu servi Estadu,” dehan Cesário da Silva ba TATOLI, iha nia knaar-fatin iha Mascarenhas, Díli, segunda (13/07).
Tuir nia, Ema ho Defisiénsia barak mak iha kapasidade no abilidade ne’ebé bele fo kontribuisaun ba dezenvolvimentu nasionál iha área oioin hanesan agrikultura, teknolójia no advokasia. “Maibé, sira sei nafatin hasoru difikuldade atu konkorre iha rekrutamentu administrasaun públika.
“Barak mak asesu ona ba edukasaun aas iha univesidade sira iha rai-laran no rai-liur. Balu remata kursu lisensiatura no mestradu, maibé bainhira partisipa iha prosesu rekrutamentu atu sai funsionáriu públiku, sira seidauk hetan konsiderasaun ne’ebé sufisiente. To’o oras ne’e, la iha kuota espesífiku ida ba sira. Tanba ne’e, ami husu ba KFP atu estabelese kuota espesífiku ba EhD, hodi garante inkluzaun no oportunidade hanesan iha servisu Estadu,” dehan nia.
Jornalista: Camilio de Sousa
Editór: Filomeno Martins
